Saturday, April 30, 2011

இன்போசிஸ் நிறுவனத்துக்கு கே.வி.காமத் புதிய தலைவர்.


இந்தியாவில் மென்பொருள் தயாரிக்கும் நிறுவனங்களில் ஒன்று இன்போசிஸ்.

மென்பொருள் தயாரிக்கும் நிறுவனங்களில் முக்கிய இடத்தை
இந்நிறுவனம் பிடித்திருக்கிறது.

ஜூலை2, 1981-ம் ஆணடு நாராயணமூர்த்தியால் இந்நிறுவனம் தொடங்கப்ட்டது.

தற்பொழுது இன்போசிஸ் நிறுவனதலைவர் நாராயணமூர்த்தி பதவிக்காலம் முடிவடைகிறது.


இதனால் அடுத்த தலைவர் யார் என்பது குறித்து பெங்களூரில் இன்போசிஸ் நிர்வாக குழு உறுப்பினர்கள் கூடி முக்கிய ஆலோசனை நடத்தினர்.

இந்நிர்வாக்குழு ஆலோசனை கூட்டத்தில் அடுத்த இன்போசிஸ் தலைவராக கே.வி.காமத் தேர்ந்தெடுக்கப்பட்டார்.

இன்போசிஸ் நிறுவனத்தின் தலைவராக இருந்த நாராயணமூர்த்தி, கே.வி.காமத்திடம் பொறுப்புகளை ஒப்படைத்தார்.


இன்போசிஸ் துணை தலைவராக கிருஷ் கோபாலகிருஷ்ணன் தேர்வு செய்யப்பட்டுள்ளார்.

இன்போசிஸ் புதிய நிர்வாக குழு ஆகஸ்ட் 21ஆம் தேதி பொறுப்பேற்கிறது.

அதிரவைக்கும் விலை உயர்வு : சவரன் ரூ 17000க்கு விற்பனையானது .


கோவையில் சவரன் விலை ரூ 17000க்கு விற்பனையானது.

தங்கத்தின் விலை இன்றும் தாறுமாறாக உயர்ந்தது. பிற்பகலுக்குள் ஒரு சவரனுக்கு ரூ 320 உயர்ந்ததால், வாடிக்கையாளர்கள் அதிர்ந்துவிட்டனர்.

நேற்று தங்கத்தின் விலை நாளுக்கு நாள் அதிகரித்து வருகிறது. ரூ.15 ஆயிரத்தை தாண்டிய ஒரு பவுன் தங்கம் படிப்படியாக உயர்ந்து தற்போது 17 ஆயிரத்தை நெருங்கி உள்ளது.

சென்னையில் கடந்த மார்ச் மாதம் 30-ந்தேதி ஒரு பவுன் தங்கம் ரூ.15 ஆயிரத்து 464-க்கு விற்றது. நேற்று ஒரு பவுன் ரூ.16 ஆயிரத்து 544 ஆக இருந்தது. இதன் மூலம் ஒரு மாதத்தில் பவுனுக்கு ரூ.1080 அதிகரித்தது.

இன்று மட்டும் ரூ 320...

இந்நிலையில் இன்று ஒரே நாளில் பவுனுக்கு மேலும் ரூ.320 உயர்ந்தது. இதன் மூலம் ஒரு பவுன், ரூ.16 ஆயிரத்து 864-க்கு விற்கப்படுகிறது.

ஒரு கிராம் ரூ.2108 ஆக உள்ளது. ஒரு பவுன் ரு.17 ஆயிரத்தை நெருங்கியுள்ளதால் ஏழை, எளிய மற்றும் நடுத்தர மக்களை மிகுந்த கவலைக்குள்ளாகியுள்ளனர்.

தங்கம் என்பது தமிழர் கலாச்சாரத்தின் அடையாளமாகிவிட்டதால், ஏழை மக்களே பெரும் பாதிப்புக்குள்ளாகியுள்ளனர்.

வருகிற 8-ந்தேதி அட்சய திருதியை வருகிறது. மேலும் திருமண முகூர்த்த நாட்களும் வர உள்ளன. இதனால் தங்கத்தின் தேவை அதிகரித்துள்ளதால் விலையும் உயர்ந்து வருவதாக தங்க நகை வியாபாரிகள் தெரிவித்தனர்.

சர்வதேச அளவில் தங்கத்தின் விலை உயர்வு மற்றும் டாலருக்கு இணையான ரூபாயின் மதிப்பு அதிகரிப்பு போன்றவையும் தங்கம் விலை உயர்வுக்கு காரணம்.

பங்குச் சந்தையில் முதலீடு செய்வது போல இப்போது தங்கத்தில் முதலீடு செய்வது அதிகரித்து உள்ளது. தனி நபர்கள் தவிர உலகம் முழுவதும் இருந்து பல நிதி நிறுவனங்கள் இவ்வாறு முதலீடு செய்து வருகின்றன.

ஆன்லைன் வர்த்தகம் நிறுத்தப்படுமா...

தங்கத்தை நேரடியாக வாங்குவது தவிர ஆன்லைன் வர்த்தகம் மூலம் தங்கத்தில் முதலீடு செய்வதும் இப்போது அதிகரித்து வருகிறது. இது போன்ற காரணங்களால் உலகம் முழுவதும் தங்கத்தின் விலை மிக வேகமாக அதிகரித்து வருகிறது. எனவே தங்கத்தை ஆன்லைனில் வாங்கி விற்க தடை விதிப்பது பற்றியும் யோசித்து வருகின்றனர்.

சேலத்தில் ரூ 416 உயர்வு:

சேலத்தில் நேற்று ஒரு கிராம் தங்கத்தின் விலை 2068 ஆகவும், ஒரு பவுனின் விலை ரூ16 ஆயிரத்து 544 ஆகவும் இருந்தது. இன்று ஒரு கிராம் ரூ 2120ஆகவும், ஒரு பவுன் ரூ16 ஆயிரத்து 960 ஆகவும் விற்றது. ஒரு நாளில் மட்டும் கிராமுக்கு ரூ52-ம், பவுனுக்கு ரூ416-ம் உயர்ந்து உள்ளது.

கோவையில் சவரன் விலை ரூ 17000க்கு விற்பனையானது.

ஸ்பெக்ட்ரம் ஒதுக்கீட்டில் ரூ.2 லட்சம் கோடி இழப்பு : இந்திய விண்வெளி கமிஷன் இன்று கூடுகிறது.

ஸ்பெக்ட்ரம் ஒதுக்கீட்டில் ரூ.2 லட்சம் கோடி இழப்பு: இந்திய விண்வெளி கமிஷன் இன்று கூடுகிறது

எஸ் பாண்டு ஸ்பெக்ட்ரம் ஒதுக்கீட்டில் ரூ.2 லட்சம் கோடி இழப்பு ஏற்பட்ட புகாரை தொடர்ந்து, இஸ்ரோவின் ஆன்டிரிக்ஸ் நிறுவனம் மாற்றி அமைக்கப்படுகிறது. இது தொடர்பாக இந்திய விண்வெளி கமிஷனின் ஆலோசனை கூட்டம் இன்று நடைபெறுகிறது.

இஸ்ரோவின் (இந்திய விண்வெளி ஆய்வு மையம்) வர்த்தக பிரிவான ஆன்டிரிக்ஸ் நிறுவனத்துக்கும், தேவாஸ் மல்டிமீடியா என்ற தனியார் நிறுவனத்துக்கும் இடையே எஸ் பாண்டு அலைகற்றை ஒப்பந்தம் ஏற்பட்டது. இந்த ஒப்பந்தத்தின்படி, எஸ் பாண்டு அலைகற்றை ஒதுக்கீட்டை 20 ஆண்டுகள் குத்தகைக்கு எடுத்த தேவாஸ் நிறுவனம் அதற்காக ஆண்டுக்கு ரூ.50 கோடி செலுத்தினால் போதும். இதனால் அரசுக்கு ரூ.2 லட்சம் கோடி இழப்பு ஏற்பட்டதாக புகார் எழுந்தது.

இதனால் இந்த ஒப்பந்தத்தை ரத்து செய்வது பற்றி மத்திய அரசு பரிசீலித்து வருகிறது. ஆனால் ஆன்டிரிக்ஸ் நிறுவனத்துடன் செய்து கொண்ட ஒப்பந்தம் சட்டபூர்வமானது என்றும், அதை ரத்து செய்ய முடியாது என்றும் தேவாஸ் நிறுவனம் கூறியிருந்தது.

இந்த விவகாரம் பெரும் சர்ச்சையை ஏற்படுத்தியுள்ள நிலையில், பிரதமர் மன்மோகன்சிங் தலைமையில் நேற்று முன்தினம் மத்திய மந்திரிசபை கூட்டம் நடைபெற்றது.

பிரதமர் கேட்டுக்கொண்டதன் பேரில் இந்த கூட்டத்தில் இஸ்ரோவின் தலைவரும், விண்வெளி துறையின் செயலாளருமான கே.ராதாகிருஷ்ணன் கலந்து கொண்டு, எஸ் பாண்டு அலைக்கற்றை ஒதுக்கீடு தொடர்பாக இஸ்ரோவின் வர்த்தக பிரிவான ஆன்டிரிக்ஸ் நிறுவனத்துக்கும், தேவாஸ் மல்டிமீடியா என்ற நிறுவனத்துக்கும் இடையே ஏற்பட்ட ஒப்பந்தத்தின் சாராம்சம் பற்றி விளக்கி கூறினார்.

பின்னர் மந்திரிசபை கூட்டத்தில் பேசிய பிரதமர் மன்மோகன்சிங், சர்ச்சைக்குரிய எஸ் பாண்டு அலைக்கற்றை ஒப்பந்தம் பற்றி விசாரணை நடத்த முன்னாள் மந்திரிசபை செயலாளரும், மத்திய திட்டக்கமிஷன் உறுப்பினருமான பி.கே.சதுர்வேதி, பிரபல விண்வெளி விஞ்ஞானியும் விண்வெளி கமிஷன் உறுப்பினருமான ரோத்தம் நரசிம்மா ஆகியோர் அடங்கிய உயர்மட்ட கமிட்டி ஒன்று அமைக்கப்பட்டு இருப்பதாக அறிவித்தார்.

இந்த இரு நபர் கமிட்டி, மேற்கண்ட இரு நிறுவனங்களுக்கும் இடையே ஏற்பட்ட ஒப்பந்தத்தில் உள்ள தொழில்நுட்பம், வர்த்தகம், விதிமுறைகள், நிதி தொடர்பான விளைவுகள் போன்றவற்றை ஆய்வு செய்கிறது. மேலும் அலைக்கற்றை ஒப்பந்தத்தை ஒரு மாதத்துக்குள் இந்த கமிட்டி ஆய்வு செய்து, விண்வெளி துறை அமைச்சகத்தை கவனித்து வரும் பிரதமர் மன்மோகன்சிங்கிடம் அறிக்கையை சமர்ப்பிக்க இருக்கிறது.

இந்நிலையில் இஸ்ரோவின் ஆன்டிரிக்ஸ் நிறுவனம் மாற்றி அமைக்கப்படுகிறது. இது தொடர்பாக இந்திய விண்வெளி கமிஷனின் ஆலோசனை கூட்டம் விண்வெளி துறையின் செயலரான ராதாகிருஷ்ணன் தலைமையில் இன்று டில்லியில் நடைபெறுகிறது

இக்கூட்டத்தில், ஆண்ட்ரிக்ஸ் - திவாஸ் ஒப்பந்தம் பற்றி விவாதித்து முக்கிய முடிவுகள் எடுக்கப்பபட்டு அரசுக்கு பரிந்துரைக்கப்பட இருக்கிறது.

நடுநிலையோடு செயல்பட வேண்டும் : சி.பி.ஐ. யாருக்கும் பயப்படக்கூடாது ; பிரதமர் மன்மோகன்சிங்.

நடுநிலையோடு செயல்பட வேண்டும்:    சி.பி.ஐ. யாருக்கும்    பயப்படக்கூடாது;    பிரதமர் மன்மோகன்சிங் அறிவுரை

டெல்லியில் சி.பி.ஐ. தலைமை அலுவலகத்தில் புதிய கட்டிடம் கட்டப்பட்டுள்ளது. இந்த கட்டிடத்தை இன்று பிரதமர் மன்மோகன்சிங் தொடங்கிவைத்தார். அப் போது அவர் பேசியதாவது:-

இந்தியாவில் உள்ள புலனாய்வு துறைகளில் சி.பி.ஐ. முதன்மை துறையாக விளங்குகிறது. இதன் பணிகள் எப்போதும் சிறப்பாக இருக்க வேண்டும். தங்கள் பணிகளில் எந்த குறுக்கீடு வந்தாலும் அதற்கு சி.பி.ஐ. அதிகாரிகள் பயப்படக் கூடாது. தங்கள் கடமைகளை சரியாக செய்ய வேண்டும். அதே நேரத்தில் செய்யும் பணிகள் நடுநிலை தவறக் கூடாது. யார் தவறு செய்தாலும், அவர்களை சட்டத்திற்கு முன் கொண்டு வந்து நிறுத்த வேண்டும் அவர்கள் எந்த உயர் அந்தஸ்தில் இருந்தாலும் அதைப்பற்றி கவலைப்படக் கூடாது.

சட்டத்தின் முன்னாள் அனைவரும் சமம். இந்தியா சட்டத்தின் படி நடக்கும் நாடு. இங்கு சட்டத்தை மீறுபவர்கள் அதற்குரிய தண்டனை பெற்றே ஆக வேண்டும். அதே நேரத்தில் யாரையும் பழிவாங்கும் வகையில் நடவடிக்கை இருக்க கூடாது. அப்பாவிகளை துன்புறுத்தவும் கூடாது. பத்திரிகைகளின் விமர்சனங்கள் போன்றவற்றுக்கு கலங்காமல் உங்கள் கடமைகளை செய்யுங்கள்.

நமது சமுதாயம் வெளிப்படையானது. எனவே ஒவ்வொரு தரப்பினரும் வெவ்வேறு கருத்துக்களை சொல்வார்கள். அதைப்பற்றி கவலைப்படாமல் எது சரியானதோ அதை செய்ய வேண்டும். சி.பி.ஐ. மிகவும் முக்கியமான வழக்கு விவகாரங்களை கவனிப்பதால் இந்த பணிகள் சவால் நிறைந்ததாக இருக்கலாம். இதை சரியாக செய்வீர்கள் என்ற நம்பிக்கை உள்ளது. சி.பி.ஐ.க்கு தேவையான நிதி உதவி, தொழில் நுட்ப உதவி, மற்றும் அனைத்து உதவிகளும் செய்து தரப்படும்.

இவ்வாறு மன்மோகன்சிங் பேசினார்.

கற்பழிப்பு முயற்சியில் மாணவி கொலை - உடலை தூக்கில் தொங்கவிட்டு வாலிபர் ஓட்டம்.

பிளஸ்-2 மாணவியை கற்பழிக்க முயன்ற அவரது உறவுக்கார வாலிபர், அந்தப் பெண்ணை கொலை செய்து தூக்கில் தொங்கவிட்டுவிட்டு தப்பியோடிவிட்டார்.

கோவையை அடுத்துள்ள துடியலூர் நாயக்கன்பாளையத்தை சேர்ந்தவர் பெரியண்ணன் மகள் தீபிகா (16). ஆர்.வி.நகரில் பாட்டி கனகலதா வீட்டில் தங்கி இருந்து பிளஸ்-2 படித்து வந்தார். தீபிகாவுக்கும், அதே பகுதியைச் சேர்ந்த தனியார் நிறுவன ஊழியரான சதீஷ் குமாருக்கும் (24) பழக்கம் இருந்து வந்தது.

முதலில் அத்தை மகன் என்ற உறவு இருப்பதாக நினைத்து சதீஷ்குமாருடன் தீபிகா பழகியுள்ளார். ஆனால், அவர் அத்தை மகன் அல்ல என்றும் உங்கள் இருவருக்கும் இடையே அண்ணன்- தங்கை உறவுதான் என்றும் தீபிகாவிடம் கூறிய கனகலதா, தகாத உறவை துண்டிக்குமாறு எச்சரித்திருந்தார்.

இந் நிலையில் நேற்றிரவு தீபிகாவின் அறைக்குள் நுழைந்த சதீஷ்குமார் தீபிகாவை கற்பழிக்க முயன்றுள்ளார். அவர் உடன்படாததால் கழுத்தை நெரித்து கொலை செய்துவிட்டு, கொலையை மறைப்பதற்காக தீபிகாவை தூக்கில் தொங்க விட்டுள்ளார்.

சத்தம் கேட்டு அந்த அறைக்கு ஓடிய கனகலதாவை தள்ளி விட்டுவிட்டு அறைக்கதவை வெளியிலிருந்து பூட்டிவிட்டு அங்கிருந்து சதீஷ்குமார் தப்பி ஓடிவிட்டார்.

அறைக்குள் சிக்கிய கனகலதா போட்ட சத்தத்தைக் கேட்டு அக்கம் பக்கத்தினர் ஓடி வந்து கதவை திறந்தனர். போலீசாருக்கு தகவல் தெரிவிக்கப்பட்டு, அவர்கள் வந்து தீபிகாவின் உடலை கைப்பற்றி பிரேதப் பரிசோதனைக்காக மருத்துவமனைக்குக் கொண்டு சென்றனர்.

தப்பியோவிட்ட சதீஷ்குமாரைப் பிடிக்க தனிப்படை அமைக்கப்பட்டுள்ளது.

அருணாச்சலப் பிரதேச முதல் அமைச்சர் பயணம் செய்த ஹெலிகாப்டர் மாயம் - பூடானில் தரையிறங்கியது..


அருணாசலப் பிரதேச முதல்வர் டோர்ஜி காண்டு பயணம் செய்த ஹெலிகாப்டர் காணாமல் போயுள்ளது.

தவாங் நகரில் இருந்து தலைநகர் இடாநகர் நோக்கி புறப்பட்ட அந்த ஹெலிகாப்டரில் முதல்வரின் தனிச்செயலர்கள் இருவர் மற்றும் பைலட்டுகள் இருவர் உடன் பயணம் செய்தனர்.

காலை 10 மணியளவில் தவாங்கில் புறப்பட்ட ஹெலிகாப்டரின் நிலை என்னவென்று தெரியவில்லை. இதனால் அருணாசலப் பிரதேசத்தில் மக்களிடையே பதற்றம் ஏற்பட்டுள்ளது.

ஹெலிகாப்டர் தவாங்கில் இருந்து புறப்பட்ட 20 நிமிடங்களில் கட்டுப்பாட்டு அறை கண்காணிப்பில் இருந்து விலகியது. கடைசியாக தவாங் அடுத்த செலா பாஸ் பகுதியில் வந்த ஹெலிகாப்டர் ராடரில் தெரிந்தது. அதன் பிறகு ஹெலிகாப்டர் இருக்கும் இடம் தெரியவில்லை.

இந்நிலையில், முதல்வரின் ஹெலிகாப்டரை தேடும் பணியில் விமானப்படையின் ஹெலிகாப்டர்கள் ஈடுபட்டுள்ளன. முதல்வர் டோர்ஜி காண்டு இந்திய ராணுவத்தின் உளவுப் பிரிவில் பணியாற்றியவர். கடந்த 2007ல் அவர் அருணாசலப் பிரதேச முதல்வராக பதவி ஏற்றார்.

பத்திரமாக பூடானில் தரையிங்கியுள்ளது.

அருணாசலப் பிரதேச முதல்வர் டோர்ஜீ காண்டூவை ஏற்றிக் கொண்டு சென்ற ஹெலிகாப்டர் காணாமல் போன நிலையில் அது பத்திரமாக பூடானில் தரையிறங்கியுள்ளது.

12 மணிநேரம் உழைப்பு ! - சீமான் மே தினச் செய்தி.


12 மணி நேரம் உழைத்தால்தான் வயிற்றைக் கழுவ முடியும் என்ற நிர்பந்தம் வந்துவிட்டது இன்றைக்கு, என தனது மே தினச் செய்தியில் குறிப்பிட்டுள்ளார் இயக்குநர் சீமான்.

நாம் தமிழர் கட்சித் தலைவர் சீமான் இன்று விடுத்துள்ள மே தின செய்தி:

சுழலும் உலகின் அச்சாணியாய் திகழும் உழைப்பாளர்களின் உரிமை நாள் மே தினம். நவீன காலம் தொழிற்கருவிகள் கண்டுபிடிப்போடு மட்டும் தொடங்கவில்லை.

ஓய்வு ஒழிச்சல் அற்றுபலமணிநேரம் அந்த தொழிற்கருவிகளுக்கு இணையாய் சுழன்று உழைத்த உழைப்பாளர்களோடும் தான் தொடங்கியது.

இருபது மணி நேரத்திற்கும் மேலாக ஆலைகளில் நசுங்கிய உழைப்பாளர்கள் எட்டுமணிநேரவேலை என்ற உரிமைக்காக போராடினார்கள்.

1886 ம் ஆண்டு மே 1ஆம் நாள் எட்டுமணி நேர வேலைக்காக அமெரிக்க தொழிலாளர் கூட்டமைப்பு அறிவித்த நாடுதழுவிய வேலை நிறுத்த போராட்டமே மே நாள் என்ற உழைப்பாளர் உரிமை தினத்தின் தொடக்கம்.

அந்த உரிமைப்போரில் துப்பாக்கிக் குண்டுக்கு பலியாகியும், தூக்குமேடை ஏறியும் உயிர்தந்த ஈகியரை இந்த நாளில் நினைவில் ஏந்துவோம்.

அந்த உரிமை தினத்தை ஆங்கில ஆட்சியின் அடக்குமுறைக்கு முறைக்கு அஞ்சாமல், 1923ஆம் ஆண்டு சென்னை கடற்கரையில் செங்கொடி ஏற்றி இந்த துணைக் கண்டத்திற்கே அறிமுகம் செய்து வைத்தவர் எங்கள் பாட்டன் சிந்தனைச் சிற்பி சிங்காரவேலர்.

நவீன காலத்தின் தொடக்கத்தில் உலகெங்கும் உழைப்பாளர்களும்அவர்களின் உரிமைப்போரும் தோன்றிய காலத்தில்தான், தமிழினமும் நாடுதோறும் கூலிகளாய் சென்றது.

தமிழர்கள் உலகிற்கு உழைப்பையும், அதன் வழி கூலி என்ற சொல்லையும் உலக மொழிகளுக்கெல்லாம் தந்து, யாதும் ஊரே யாவரும் கேளிர் என்ற எம் முப்பாட்டனின் பொதுமைக்கு உயிர்கொடுத்தான்.

தொழிலாளர்களின் உரிமைப் போராட்டத்தில் உலகமுதலாளிகள் கற்றுக் கொண்ட பாடம். இன ஒடுக்குமுறை. அதனால்தான் உலகத்தொழிலாளர்களே ஒன்றுபடுங்கள் என்று முழங்கிய மாமேதை லெனின், ஒடுக்கும் இனத்தின் தொழிலாளர்கள் ஒடுக்கப்படும் இனத்தின் விடுதலைக்கு போராடவேண்டும் என்றார்.

எம் தமிழினத்திற்கு வந்த சாபக்கேடோ என்னவோ இந்திய பொதுவுடைமையாளர்கள் இதை வாய்ப்பாக மறந்துபோனார்கள்.

அதன்விளைவுதான் 30 கடல் மைல் தொலைவில் எம் உறவுகள் இன ஒடுக்கு முறையால் மண்ணின் மைந்தர்கள் என்ற உரிமையை மட்டுமல்ல உழைப்பாளர்கள் என்ற தகுதியையும் இழந்து பிச்சைக்காரர்களாய் கையேந்தி நிற்கிற கொடுமை.

தாய்த்தமிழகத்திலோ தொழில் வாய்ப்புகள் அனைத்தும் திட்டமிட்டு அழிக்கப்படுகின்றன. இருபது ஆண்டுகளுக்கு முன்னால் இருந்த ஏராளமான தொழிற்சாலைகள் இழுத்து மூடப்பட்டு, தமிழர்களை அத்தக் கூலிகளாக மட்டுமே ஏற்கும் பன்னாட்டு தொழிற்சாலைகள் பெருகியுள்ளன.

பெரும்பாலான தொழிலாளர்கள் தொழிற்சங்க உரிமையற்ற உதிரிகளாய் மாற்றப்பட்டிருக்கின்றனர். கொஞ்சநஞ்சம் உள்ள ஆலைகளிலும், 12 மணி நேரத்திற்கும் மேல் உழைத்தால் தான் வயிற்றைக் கழுவ முடியும் என்ற நிலை.

உழவுத்தொழில் தன் இறுதிக்காலத்தில் துடித்துக் கொண்டிருக்கிறது, உழவுக்கு அடுத்த நிலையில் இருந்த நெசவுத்தொழில் அழிந்து விட்டது. பட்டினிச் சாவுகளும், குடும்பமாய் தற்கொலை செய்து கொள்வதும் தமிழர்களின் தலைவிதியாகிக் கொண்டு வருகிறது.

இந்த நிலையிலிருந்து மீள்வதற்கும், இன அழிப்பு உள்ளிட்ட அனைத்து ஒடுக்குமுறையிலிருந்தும் விடுபட்டு உழைப்பாளர்கள் உரிமைக்காய் ஒன்று சேர்வதற்கும், மேதின ஈகிகளின் நினைவைத் தாங்கி தொடர்ந்து உழைப்போம்.

இவ்வாறு மே தின செய்தி அறிக்கை வெளியி்டப்பட்டுள்ளது.

காதலிக்க மறுத்த பெண்ணை விபசார அழகியாக சித்தரித்து இன்டர்நெட்டில் ஆபாச தகவல் - சாப்ட்வேர் நிறுவன ஊழியர் கைது.


தன்னைக் காதலிக்க மறுத்த பெண்ணை விபச்சாரப் பெண்ணாக சித்தரித்து, இணையத்தளங்களில் அவர் குறித்து தவறான தகவல்களை வெளியிட்ட சென்னை சாப்ட்வேர் நிறுவன ஊழியர் கைது செய்யப்பட்டார்.

சென்னை அமைந்தகரையை சேர்ந்த ஸ்ருதி (23) (பெயர் மாற்றப்பட்டுள்ளது) பி.எஸ்.சி. கம்ப்யூட்டர் சயின்ஸ் முடித்துவிட்டு தனியார் சாப்ட்வேர் நிறுவனத்தில் பணியாற்றி வருகிறார்.

இவர் கடந்த வாரம் சென்னை போலீஸ் கமிஷனர் ராஜேந்திரனை சந்தித்து புகார் மனு கொடுத்தார். அதில், எனக்கு திருமணம் செய்வதற்காக பெற்றோர்கள் மாப்பிள்ளை பார்த்து வருகிறார்கள். இந்த நிலையில் எனக்கு அவப்பெயரை உண்டாக்கும் வகையில் ஆபாச தகவல்கள் ஒரு இணையத்தளத்தில் வெளியிடப் பட்டுள்ளது. எனது தோழிகளுக்கும், எனது உறவினர்களுக்கும் இந்த ஆபாச தகவல்கள் இணையத்தளம் மூலம் அனுப்பப்பட்டுள்ளது.

என்னை ஒரு விபசார அழகியாக சித்தரித்து எனது செல்போன் நம்பரையும், எனது போட்டோவையும் இணையத்தளத்தில் வெளியிட்டுள்ளன. இந்தத் தகவல்களை பார்த்து எனது உறவினர்களும் தோழிகளும் துக்கம் விசாரிப்பது போல என்னிடம் விசாரிக்கிறார்கள்.

இதனால் நான் மிகுந்த அவமானத்துக்குள்ளாகி கடுமையான மன உளைச்சலில் உள்ளேன். இந்த ஆபாச தகவல்களை அனுப்பிய நபர் யார் என்று கண்டுபிடித்து அவர் மீது சட்டப்பூர்வ நடவடிக்கை எடுக்கும்படி கேட்டுக் கொள்கிறேன் என்று கூறியிருந்தார்.

இது குறித்து `சைபர் கிரைம்' போலீசார் நடத்திய விசாரணையில் விருகம்பாக்கத்தில் உள்ள பிரபல கம்ப்யூட்டர் நிறுவனத்தில் இருந்து இந்த ஆபாச தகவல்கள் இணையத்தளத்தில் அப்லோட் செய்யப்பட்டது கண்டறியப்பட்டது.

அந்த நிறுவனத்தில் போலீசார் நடத்திய விசாரணையில், அங்கு ஹெச்.ஆர். பிரிவில் வேலை பார்க்கும் பாலமுருகன் (32) என்பவர் தான் இதைச் செய்தார் என்பது தெரியவந்தது. இதையடுத்து அவர் கைது செய்யப்பட்டார். அவர் தந்த வாக்குமூலத்தில்,

நானும் அந்தப் பெண்ணும் அண்ணாநகரில் உள்ள கம்ப்யூட்டர் நிறுவனம் ஒன்றில் முதலில் வேலை பார்த்தோம். அப்போது அவரை நான் ஒருதலைபட்சமாக காதலித்தேன். ஆனால், எனது காதலை அவர் நிராகரித்துவிட்டார். வேலையில் இருந்தும் நின்று விட்டார். அவர் நடந்து கொண்ட விதம் எனது மனதில் மிகப் பெரிய காயத்தை உண்டாக்கியது.

அதற்கு பழிவாங்கும் வகையில் அவரைப் பற்றி ஆபாச தகவல்களை இணையத் தளத்தில் வெளியிட்டு விட்டேன் என்று கூறியுள்ளார்.

பாலமுருகனை போலீசார் நீதிமன்றத்தில் ஆஜர்படுத்தி 15 நாட்கள் நீதிமன்ற காவலில் புழல் மத்திய சிறையில் அடைத்தனர். பாலமுருகன் மீது பெண்கள் வன்கொடுமை தடுப்பு சட்டப் பிரிவு உள்பட 3 சட்டப் பிரிவுகளின் கீழ் வழக்குகள் பதிவு செய்யப்பட்டுள்ளன.

மே 9ம் தேதி பிளஸ் டூ தேர்வு முடிவுகள்.


மே 9ம் தேதி பிளஸ் டூ தேர்வு முடிவுகள் வெளியாகும் என தமிழக பள்ளிக் கல்வித்துறை அமைச்சர் தங்கம் தென்னரசு இன்று அறிவித்தார்.

தேர்வு முடிவுகளை இணையத் தளங்களிலும் எஸ்எம்எஸ் மூலம் பார்க்க ஏற்பாடு செய்யப்பட்டுள்ளதாகவும், பத்தம் வகுப்பு தேர்வு முடிவுகள் வெளியாகும் தேதி பின்னர் அறிவிக்கப்படும் என்றும் அமைச்சர் தெரிவித்துள்ளார்.

முன்னதாக மே 14ம் தேதி பிளஸ்-2 தேர்வு முடிவுகள் அறிவிக்கப்படும் என்று கல்வித்துறை செயலாளர் சபீதா அறிவித்திருந்தார். மே 13ம் தேதி தமிழக சட்டமன்றத் தேர்வு முடிவுகள் வெளியாகும் நிலையில், அடுத்த நாளே பிளஸ் டூ தேர்வு முடிவுகள் வெளியாவது குழப்பமான நிலையை உருவாக்கும் என பல தரப்பிலும் எதிர்ப்பு தெரிவிக்கப்பட்டது.

மேலும் தேர்வு முடிவுகளை வெளியிடுவது குறித்து கல்வித்துறை செயலாளர் சபீதா தன்னுடனோ அரசிடமோ ஆலோசனை நடத்தாமல் தன்னிச்சையான முடிவெடுத்துள்ளதாக அமைச்சர் தங்கம் தென்னரசு கண்டனம் தெரிவித்திருந்தார்.

வழக்கமாக கல்வித்துறை அதிகாரிகள், செயலாளர் ஆகியோர் அமைச்சருடன் ஆலோசனை நடத்தி, அதன்பிறகு முதலமைச்சரின் ஒப்புதல் பெற்ற பிறகே பிளஸ் தேர்வு முடிவுகளை கல்வி அமைச்சர் வெளியிடுவது வழக்கம். ஆனால், தேர்தல் கமிஷனின் நடவடிக்கைகளால் திமுக அரசு காபந்து அரசு தான் என்ற முடிவுக்கு வந்துவிட்ட சபீதா தானாகவே தேதியை அறிவித்தார். அவர் மீது ஜெயலலிதா ஆதரவாளர் என்ற புகாரும் கூறப்பட்டு வருகிறது.

விரைவில் தமிழகத்தில் ஆட்சி மாற்றம் ஏற்படும் என்று அதிகாரிகள் மத்தியில் கருத்து நிலவுவதாக ஏற்கனவே பேச்சு உள்ளது. இந்த நிலையில், தேர்தல் ஆணையம் கடைப்பிடித்து வரும் பல்வேறு கட்டுப்பாடுகளைப் பயன்படுத்தி சபீதா உள்ளிட்ட சில அதிகாரிகள் சிலர் தன்னிச்சையாக நடந்து வருவதாக குற்றச்சாட்டு கூறப்பட்டு வருகிறது.

இந் நிலையில் மே 9ம் தேதியே பிளஸ் டூ தேர்வு முடிவுகள் வெளியாகும் என அமைபச்சர் தங்கம் தென்னரசு அதிகாரப்பூர்வமாக இன்று அறிவித்துள்ளார்.

அதிக மைலேஜ் தரும் கார் - வாயடைக்க வருகிறது நானோ டீசல்.


பைக்குகளுக்கு குட்பை சொல்லும் காலம் விரைவில் வரப்போகிறது. ஆம், லிட்டருக்கு 40 கி.மீ., செல்லும் நானோ டீசல் காரை விரைவில் அறிமுகப்படுத்த உள்ளது டாடா மோட்டார்ஸ்.

உதிரிபாகங்கள் மற்றும் எஞ்சின் தொழில்நுட்பத்தில் புகழ்பெற்ற போஸ்ச் நிறுவனத்துடன் இணைந்து நானோவுக்கான டீசல் எஞ்சினை உருவாக்கி வருகிறது டாடா. அடுத்த ஆண்டு மார்ச்சுக்குள் டீசல நானோ அறிமுகப்படுத்தப்பட உள்ளது.

டீசல் நானோ குறித்து போஸ்ச் மூத்த நிர்வாகி ஒருவர் கூறியதாவது:

"நானோவுக்கான பெட்ரோல் எஞ்சின் தயாரிப்பதில் டாடாவுடன் இணைந்து பணியாற்றினோம். அதேபோன்று, நானோவுக்கான டீசல் எஞ்சின் தயாரிப்பதிலும் டாடாவுடன் இணைந்து பணியாற்றி வருகிறோம். இந்த எஞ்சின் 700 சிசி கொண்டதாக இருக்கும்.

மேலும், ஒரு லிட்டருக்கு 40 கி.மீ., செல்லும் வகையில் இந்த எஞ்சின் உருவாக்கப்பட்டு வருகிறது. அதேவளை, செயல்திறனிலும் இது சிறப்பாக இருக்கும். நானோ டீசலில் மாடலில் ஒரு கி.மீ., பயணம் செய்ய வெறும் ஒரு ரூபாய்தான் செலவாகும்.

180 சிசி மோட்டார்சைக்கிளில் ஒரு கி.மீ., பயணம் செய்வதற்கு ஆகும் செலவும், நானோவில் செல்வதற்கான செலவும் சமமாக இருக்கும். எனவே, மார்க்கெட்டில் டீசல் நானோ புதிய புரட்சியை ஏற்படுத்தும்," என்றார்.

இதை டாடா மோட்டார்ஸ் செய்திதொடர்பாளர் கூறுகையில்,"அதிக மைலேஜ் தரும் கார்களை தொடர்ந்து அறிமுகப்படுத்தி வருகிறோம். அந்த வரிசையில் நானோ டீசல் மாடல் புதிய சகாப்தம் படைக்கும்," என்று கூறினார்.

'சராசரி அறிவு'... ஜோஷி மீது ப.சிதம்பரம் கடும் தாக்கு


2ஜி ஸ்பெக்ட்ரம் ஒதுக்கீடு தொடர்பாக நாடாளுமன்ற பொதுக் கணக்குக் குழு தலைவர் முரளி மனோகர் ஜோஷி எழுதிய அறிக்கை முற்றிலும் உண்மைக்குப் புறம்பானது, உண்மையைத் திரித்து எழுதப்பட்டுள்ளது. லைசென்ஸ்களுக்கு கட்டணம் நிர்ணயிப்பது தொடர்பாக பிரதமருக்கு நான் அளித்த யோசனைகளை ஜோஷி வேண்டுமென்றே குறிப்பிடப்படாமல் தவிர்த்துள்ளார் என்று மத்திய உள்துறை அமைச்சர் ப. சிதம்பரம் கூறினார்.

அவர் வெளியிட்டுள்ள அறிக்கையில்,

கடந்த 15.1.2008ம் தேதி பிரதமர் மன்மோகனுக்கு நான் கடிதம் ஒன்றை அனுப்பினேன். அதில் 2ஜி ஸ்பெக்ட்ரம் ஒதுக்கீட்டிற்கான நுழைவுக் கட்டணம் பற்றி நான் எதுவும் தெரிவிக்கவில்லை, பயன்பாட்டுக் கட்டணம் பற்றி மட்டுமே குறிப்பிட்டிருந்தேன்.

இதை சராசரி அறிவுள்ள ("average intelligence") எவரும் கவனத்தில் கொள்ள முடியும். ஆனால், முரளி மனோகர் ஜோஷியின் அறிக்கையில் 2008ல் பிரதமருக்கு நான் எழுதிய கடிதத்தில் கூறப்பட்ட விஷயங்கள் திரித்துக் கூறப்பட்டுள்ளன.

மாறாக நான் இந்த விஷயம் முடிந்தபோன விஷயம் (matter as closed) , இதை இத்துடன் விட்டுவிடலாம் என்று பிரதமரிடம் கூறியதாக தவறான வகையில் குறிப்பிட்டுள்ளார் ஜோஷி.

அதே நேரத்தில் ஸ்பெக்ட்ரம் விற்பனை மூலம் கூடுதலாக அரசுக்கு பணம் ஈட்டுவது எப்படி என்று நான் எனது கடிதத்தில் குறிப்பிட்டிருந்த 3 யோசனைகளை ஜோஷி திட்டமிட்டு மறைத்துள்ளார்.

ஜோஷியின் வரைவு அறிக்கையில் என்ன விஷயம் இடம் பெற வேண்டுமோ அது இடம் பெறவில்லை. ஸ்பெக்ட்ரம் லைசென்ஸ்களுக்கு முறையாக கட்டணம் வசூலிப்பது தொடர்பாக, நிதி அமைச்சர் என்ற முறையில் நான் தெரிவித்த யோசனைகள் எல்லாம் குறிப்பிடப்படவில்லை.

ஸ்பெக்ட்ரம் என்பது மிகவும் அரியதானது, அதனால் அதன் மதிப்பை உணர்ந்து விலை நிர்ணயிக்கப்பட வேண்டும் என்று நான் குறிப்பிட்டிருந்தேன். இதை யெல்லாம் ஜோஷி வேண்டுமென்றே மறைத்துவிட்டு அறிக்கையை தயார் செய்துள்ளார் என்று கூறியுள்ளார்.

இதே விவரங்களை நிருபர்களிடமும் சிதம்பரம் விளக்கினார். அவர் கூறுகையில், 2ஜி ஸ்பெக்ட்ரம் விவகாரத்தில் எனக்கு நேரடித் தொடர்பு என்று முன்னாள் நிதியமைச்சர் யஷ்வந்த் சின்கா கூறியதற்கு நான் ஏன் பதிலளிக்க வேண்டும்? என்றார்.

"சராசரி அறிவுள்ள எவரும் என் கருத்தைப் புரிந்து கொள்வர்'' என்று நீங்கள் கூறியது, முரளி மனோகர் ஜோஷியைக் குறிப்பிடுவதாக கருதலாமா என்று நிருபர்கள் கேட்டதற்கு, நான் அப்படி கூறவில்லை. என்னை போல சராசரி ஆள் புரிந்து கொள்ளலாம் என்று என்னையே நான் கூறிக் கொண்டேன் என்றார் பதிலடியாக.

அறிக்கையை சபாநாயகரிடம் தர ஜோஷி:

பொதுக் கணக்குத் தலைவராக இருந்து கொண்டு தனது குழுவில் உள்ளவர் களிடமே முழுமையாக ஆலோசிக்காமல் பிரதமர், சிதம்பரம் மீது கடும் குற்றங்களை சுமத்தி தானே எழுதிய அறிக்கையை மக்களவை சபாநாயகர் மீரா குமாரிடம் அளிக்க அதன் தலைவர் முரளி மனோகர் ஜோஷி முடிவு செய்துள்ளார்.

ஜோஷி தலைமையிலான பிஏசி குழுவின் பதவிக்காலம் இன்றுடன் முடிவது குறிப்பிடத்தக்கது.

இதற்கிடையே ஜோஷியை நீக்கி, அவருக்குப் பதிலாக சைபுதீன் சோஸ் தலைவராக நியமித்தும், ஜோஷி எழுதிய அறிக்கையை நிராகரித்தும் பொதுக் கணக்குக் குழுவில் தீர்மானம் நிறைவேற்றப்பட்டுவிட்டதால், இந்த அறிக்கையே செல்லுபடியாக ஒன்றாக விட்டதாகவே கருதப்படுகிறது.

காங்கிரஸை மாட்டிவிடுகிறேன் பேர்வழி என்ற அவசரத்திலும் பாஜகவுக்கு ஆதாயம் தேடவும் ஜோஷி காட்டிய அவசரம், அவருக்கே எதிராகத் திரும்பி விட்டது. இதன்மூலம் ஆதாயம் தேட முயன்ற பாஜகவுக்கும் காங்கிரஸ் செக் வைத்துவிட்டது.

இந் நிலையில் அறிக்கையை சட்டப்பூர்வமாக தாக்கல் செய்வது குறித்து ஜோஷி அதிமுக, பிஜு ஜனதா தளம், இடதுசாரி உறுப்பினர்களுடன் நேற்று ஜோஷி ஆலோசனை நடத்தினார். அதில், அறிக்கையை சபாநாயகரிடம் அளிப்பது என்று முடிவு செய்யப்பட்டது.

ஜப்பான் புகுஷிமா அணு உலை குளிர்விக்கப்பட்டது.

புகுஷிமா அணு உலை குளிர்விக்கப்பட்டது

கடந்த மாதம் ஜப்பானில் ஆழிப்பேரலை, நிலநடுக்கம் தாக்கியது. இதில் ஜப்பானே நிலைகுழைந்து போனது. இதில் 30 ஆயிரத்திற்கும் மேற்பட்டோர் உயிரிழந்தனர். மேலும் சுனாமி, நிலநடுக்கம் காரணமாக ஜப்பானில் உள்ள புகுஷிமா அணு உலைகள் பெரும் பாதிப்பை சந்தித்தன.

இதில் அணு உலைகளை குளிர்விக்கும் குழாய்கள் வெடித்ததால் பாதிப்பு ஏற்பட்டது. இதனால் கதிர் வீச்சு ஏற்பட்டது. இதனைத் தொடர்ந்து ஜப்பான் அணுஉலை பாதுகாப்பு அமைப்பு கதிர்வீச்சை கட்டுப்படுத்தவும், அதனை சரி செய்யவும் மும்முரமாக இறங்கியது.


இதற்கு ஜப்பான் மேலை நாடுகளின் உதவியை நாடியது. இந்நிலையில் அணு உலைக்கு குளிர்விக்கும் குழாயை சரிசெய்து தற்பொழுது அணு உலைக்கு குளிர்விக்கு டன் கணக்கான தண்ணீரை குளிர்விக்கும் குழாய் மூலம் தண்ணீரை செலுத்தி வருகின்றது.

இதனால் புகுஷிமாவின் முதல் அணு உலை மீண்டும் வெற்றிகரமாக செயல்படுகின்றது என அணு உலை பாதுகாப்பு அமைப்பு தெரிவித்துள்ளது.

மாலை 5 மணிக்குள் பணிக்கு திரும்ப வேண்டும் ; ஏர் இந்தியா நிர்வாகம் விமானிகளுக்கு கெடு.

மாலை 5 மணிக்குள் பணிக்கு திரும்ப வேண்டும்;ஏர் இந்தியா நிர்வாகம் விமானிகளுக்கு கெடு.

ஏர் இந்தியா நிறுவனத்தில் பணிபுரியும் விமானிகள் ஊதிய உயர்வு, நிர்வாக குளறுபடிகளை சீர்செய்தல் உள்பட பல்வேறு கோரிக்கைகளை வலியுறுத்தி கடந்த 26-ந் தேதி நள்ளிரவு முதல் காலவரையற்ற வேலை நிறுத்தத்தில் ஈடுபட்டது.

இதனால் ஏர் இந்தியா நிறுவனத்தின் 320 விமானங்களில் 270 விமானங்கள் இயங்கவில்லை. இதனால் உள்நாட்டு, வெளிநாட்டு விமான சேவை தடைபட்டது.

இதனைத் தொடர்ந்து விமானிகள் உடனடியாக வேலை நிறுத்தத்தை வாபஸ் பெறவேண்டும் என டெல்லி ஐகோர்ட்டு கூறியது. ஆனால் தங்கள் கோரிக்கை தொடர்பாக சுப்ரீம் கோர்ட்டை அணுகப் போவதாக விமானிகள் சங்கம் தெரிவித்திருந்தது.

இன்று 3-வது நாளாக வேலைநிறுத்தம் நீடிப்பதால் பயணிகள் பெரும் அவதிக்குள்ளாகி வருகின்றனர். இதனால் ஏர் இந்தியா முன்பதிவு டிக்கெட் 5 நாட்களுக்கு நிறுத்தி வைக்கப்பட்டுள்ளது என ஏர் இந்தியா நிர்வாகம் தெரிவித்துள்ளது.

இந்நிலையில் உயர்நீதிமன்றத்தின் அறிவுறுத்தலின்படி இன்று மாலை 5 மணிக்குள் பணிக்கு திரும்ப வேண்டும் என்று ஏர் இந்தியா நிர்வாகம் கெடு விடுவித்துள்ளது.

சாய்பாபா மறைந்த புட்டபர்த்தி புண்ணிய தலமாக மாற்றப்படும் ; ஆந்திர மந்திரி அறிவிப்பு.

சாய்பாபா மறைந்த புட்டபர்த்தி புண்ணிய தலமாக மாற்றப்படும்; ஆந்திர மந்திரி அறிவிப்பு

ஆந்திர மாநிலம் புட்டபர்த்தியில் ஆசிரமம் அமைத்து ஆன்மீக பணிகளில் ஈடுபட்ட சாய்பாபா கடந்த 24-ந்தேதி மரணம் அடைந்தார். கடந்த புதன்கிழமை அவரது உடல் அங்குள்ள பிரசாந்தி நிலையத்தில் அடக்கம் செய்யப்பட்டது. பின்னர் அவரது சமாதியை தரிசனம் செய்ய பொது மக்களுக்கு அனுமதி அளிக்கப்பட்டது.

உலகம் முழுவதிலும் இருந்து லட்சக்கணக்கான பக்தர்கள் திரண்டு வந்து சாய்பாபா சமாதியை தரிசனம் செய்தனர். இன்றுடன் சமாதி தரிசனம் முடிவடைகிறது. சாய்பாபா மறைந்த புட்டபர்த்தி புண்ணிய தலமாக மாற்றப்படும் என்று ஆந்திர மந்திரி ரகுவீரா ரெட்டி தெரிவித்தார். அவர் கூறியதாவது:-

சாய்பாபா வாழ்ந்து மறைந்த புட்டபர்த்தி மிகவும் புனிதமான தலம். இதை உலகின் மிகப் பெரிய புண்ணிய தலமாக மாற்ற ஆந்திர அரசு நடவடிக்கை எடுக்கும். சாய்பாபா ஆசிரமத்தை மேம்படுத்த பல்வேறு திட்டங்கள் தீட்டப்பட்டு செயல்படுத்தப்படும்.

சாய்பாபா தனது காலத்தில் ஏழை, எளியோர் நலம் பெற இலவச மருத்துவமனை, கல்வி கூடங்களை ஏற்படுத்தி சிறந்த முறையில் செயல்படுத்தினார். அவரது பணி தொடர மாநில அரசு அத்தனை உதவிகளையும் செய்யும்.

இவ்வாறு அவர் கூறினார்.

என்டோ சல்பானை ஒழிக்க கேரளாவில் போராட்டம்.


இயற்க்கை எழில் கொஞ்சும் கேரளாவில் மக்கள் அதிகமாக வளர்ப்பது தென்னை மரங்களைத் தான்.

அந்த தென்னை மரங்கள் மற்றும் பயிர்களில் பூச்சிக்கொல்லியாக என்டோ சல்பான் என்னும் பூச்சிக்கொல்லி மருந்து பயன்படுத்தப்பட்டது.

இதனால் விவசாயிகள் உடல் நலம் பாதிக்கப்படுவதாகவும், இதற்கு என்டோ சல்பான் பூச்சிக்கொல்லி மருந்தே காரணம் என்றும் கேரள அரசு கூறியது.

மேலும் இந்த மருந்தை விவசாயிகள் பயன்படுத்த தடை விதிக்க வேண்டும் என்று மத்திய அரசுக்கு கோரிக்கை விடுத்தது.

இதை வலியுறுத்தி திருவனந்தபுரத்தில் கடந்த 15-ந்திகதி முதல் மந்திரி அச்சுதானந்தன் தலைமையில் உண்ணாவிரதம் நடந்தது. அடுத்த கட்டமாக இன்று காலை 6 மணி முதல் மாலை 6 மணி வரை கேரளா முழுவதும் முழு அடைப்பு போராட்டம் நடைபெறும் என்று மார்க்சிஸ்ட் கம்யூனிஸ்டு அறிவித்தது.

அதன்படி கேரளா முழுவதும் இன்று காலை 6 மணி முதல் முழு அடைப்பு போராட்டம் தொடங்கியது. இதனால் கேரளாவில் பஸ்கள் எதுவும் ஓடவில்லை. வர்த்தக நிறுவனங்களும் மூடிக்கிடந்தன. சாலைகள் வெறிச்சோடி காணப்பட்டன. பால் மற்றும் மருந்து கடைகள் மட்டும் திறந்திருந்தன. ஆங்காங்கே ஒருசில பெட்டி கடைகளும் திறந்திருந்தது.

முழு அடைப்பு காரணமாக தேர்வுகள் ஒத்தி வைக்கப்பட்டன. தனியார் நிறுவனங்கள் சிலவும் இன்று மூடப்பட்டது. திறந்திருந்த ஒரு சில நிறுவனங்களிலும் குறைந்த அளவே ஊழியர்கள் பணிக்கு வந்திருந்தன.

வெளிநாடுவாழ் இந்தியர் அமைச்சக தலைமையகம் கட்டும்பணி தொடக்கம் : அமைச்சர் வயலார் ரவி.



வெளிநாடு வாழ் இந்தியர்கள் நல அமைச்சகத்திற்கான தலைமை அலுவலகம் கட்டும்பணி வியாழக்கிழமை தில்லியில் தொடங்கிவைக்கப்பட்டது.

மத்திய வெளிநாடுவாழ் இந்தியர் நலத்துறை அமைச்சர் வயலார் ரவி இந்த கட்டுமானப்பணியை தொடங்கிவைத்து பேசினார் - அவர் பேசியது :

வெளிநாடுகளில் வசிக்கும் இந்தியர்களுக்கு இணைப்புப் பாலமாக இந்த தலைமை அலுவலகம் திகழும். இதன் கட்டுமானப்பணிகள் 2013-ம் ஆண்டு ஏப்ரல் மாத இறுதிக்குள் முடிவடையும்.

இந்த கட்டத்தை கட்டுவதற்கு நிதி ஒரு பிரச்னையாக இராது. இக்கட்டடம் வெளிநாடு வாழ் இந்தியர்களுக்கு மிகவும் பயனளிக்கும்வகையில் சகல வசதிகளும் கொண்டதாக கட்டப்படும். இதில் நூலகம், கருத்தரங்குக் கூடங்கள், விருந்தினர் விடுதி, நிரந்தர கண்காட்சிக்கூடம், விற்பனை மையங்கள் போன்றன மிக நவீனமான முறையில் அமைக்கப்படும்.

தேசிய கட்டுமான நிறுவனத்திடம் இந்த கட்டடத்தைக் கட்டும்பணி ஒப்படைக்கப் பட்டுள்ளது.

இந்த தலைமையக கட்டடம் உருவாக்கப்படும் என்று 2004-ம் ஆண்டிலேயே அறிவிக்கப்பட்டது. ரூ.80 கோடி செலவில் கட்டப்படவுள்ள இந்த தலைமையகத்திற்கு பிரதமர் மன்மோகன்சிங் கடந்த ஜனவரி மாதம் அடிக்கல் நாட்டினார் இப்போது கட்டடம் கட்டும்பணி தொடங்கிவைக்கப்பட்டுள்ளது.

எதிர்காலத்தில் இந்த தலைமையகம் வெளிநாடு வாழ் இந்தியர்களின் பல்வேறு தேவைகளைப் பூர்த்தி செய்யக்கூடியதாக இருக்கும் என்றார்.

பின்லேடன் மகன் 2002-ல் பாகிஸ்தானில் வசித்தார் : விக்கி லீக்ஸ்.

ஒசாமா பின்லேடனின் மகன்களில் ஒருவரான சயீது பின்லேடன் 2002-ம் ஆண்டு பாகிஸ்தானின் கராச்சி நகரில் பாதுகாப்பாக வசித்து வந்ததாக விக்கி லீக்ஸ் இணைய தளம் தெரிவித்துள்ளது.

2001-ம் ஆண்டு செப்டம்பர் 11-ம் தேதி நிகழ்த்தப்பட்ட நியூயார்க் இரட்டை கோபுர தாக்குதலுக்கு பிறகு அவர் தனது குடும்பத்துடன் கராச்சி நகரில் வசித்துள்ளார். இந்தத் தகவலை அவருக்கு நெருக்கமானவரும் நியூயார்க் தாக்குதலில் மூளையாக செயல்பட்டவருமான அப்துல் ரப்பானி அபு ரஹ்மான் தெரிவித்ததாக அந்தத் தகவல் கூறுகிறது.

அபு ரஹ்மான் 2002-ம் ஆண்டு பாகிஸ்தானில் கைது செய்யப்பட்டார். பின்னர் அவர் விசாரணைக்காக அமெரிக்காவின் குவான்தனாமோ தடுப்பு காவல் மையத்துக்கு கொண்டு செல்லப்பட்டார்.

பாகிஸ்தானில் கராச்சியிலும் பிற பகுதிகளிலும் அல் காய்தா முக்கிய தீவிரவாதிகள் பதுங்குவதற்கு உருவாக்கப்பட்ட பாதுகாப்பான இல்லங்களை நிர்வகிப்பது, அல் காய்தாவின் முக்கிய பிரமுகர்களுடன் தொடர்பு கொண்டு சதித் திட்டங்களை தீட்டுவது உள்ளிட்டவை இவரது வேலைகளாக இருந்துள்ளன. நியூயார்க் இரட்டை கோபுர தாக்குதலில் தொடர்புள்ளதாக குற்றம் சாட்டப்படும் 19 பேரில் 17 பேருக்கு அவர் நேரடியாக உதவி செய்துள்ளார். பல முறை இவர் ஒசாமா பின் லேடனை நேரில் சந்தித்துள்ளார்.

2002-ம் ஆண்டு ஜனவரி மாதம் முதல் ஜூன் மாதம் வரை பாகிஸ்தானில் பாதுகாப்பாக சயீது பின்லேடன் வசித்ததாக அவர் தெரிவித்துள்ளார். இந்தத் தகவல்கள் 2008-ம் ஆண்டு ஜூன் 9-ம் தேதி தயாரிக்கப்பட்ட அமெரிக்காவின் விசாரணை அறிக்கையில் இடம் பெற்றுள்ளதாக விக்கி லீக்ஸ் தெரிவித்துள்ளது.

எண்டோ சல்ஃபானுக்கு தடை : இந்தியா சம்மதம்


சுற்றுச் சூழல், உடல் நலத்துக்கு ஆபத்தானதாகக் கருதப்படும் பூச்சிக் கொல்லி மருந்தான எண்டோ சல்ஃபானைத் தடை செய்வதற்கு சர்வதேச மாநாட்டில் இந்தியா சம்மதம் தெரிவித்துள்ளது.

எனினும் இந்தியா உள்ளிட்ட வளரும் நாடுகளுக்கு இந்தத் தடையில் பல்வேறு விலக்குகள் அளிக்கப்பட்டிருக்கின்றன. எண்டோ சல்ஃபானை முற்றிலுமாக தடை செய்வதற்கு 11 ஆண்டு அவகாசம் அளிக்கப்பட்டிருப்பது இதில் முக்கியமானதாகும்.

சுற்றுச்சூழலுக்குக் கேடு விளைவிக்கும் கரிமவேதிப் பொருள்கள் தொடர்பான ஸ்டாக்ஹோம் தீர்மானம் குறித்த சர்வதேச மாநாடு கடந்த 5 நாள்களாக ஜெனீவாவில் நடந்தது. இதில் இந்தியா உள்பட பல்வேறு நாடுகளைச் சேர்ந்த பிரதிநிதிகள் கலந்து கொண்டனர்.

இந்த மாநாட்டில், எண்டோ சல்ஃபானை முழுமையாகத் தடை செய்வதற்கு நீண்டகால அவகாசம் வழங்குவது, பாதுகாப்பான, குறைந்த விலையிலான மாற்றுப் பொருளை கண்டறிவது போன்ற கோரிக்கைகள் வளரும் நாடுகள் சார்பில் வைக்கப்பட்டன. இந்தக் கோரிக்கைகள் மாநாட்டில் ஏற்கப்பட்டிருப்பதாக இந்திய சுற்றுச்சூழல் அமைச்சகத்தின் அதிகாரி ஒருவர் தெரிவித்தார்.

எண்டோ சல்ஃபானை தடை செய்யும்போது, உரிய நிதிஉதவி வழங்கப்பட வேண்டும் என்றும் இந்தியா கோரியிருப்பதாகத் தெரிகிறது. இதற்கு இந்தோனேசியா உள்ளிட்ட நாடுகள் ஆதரவு தெரிவித்திருப்பதாகக் கூறப்படுகிறது. எண்டோ சல்ஃபானுக்கு விதிமுறைகளுடன் கூடிய தடை விதிக்கப்பட வேண்டும் என்று சீனா சார்பில் கோர்ப்பட்டது.

எனினும், எண்டோ சல்ஃபானுக்குத் தடை விதிப்பதற்கு அனைத்து நாடுகளும் சம்மதித்தன. இதையடுத்து, மாநாட்டு தீர்மான வரைவில் தடை செய்யப்பட்ட வேதிப்பொருள்கள் பட்டியலில் எண்டோ சல்ஃபானும் சேர்க்கப்பட்டிருக்கிறது. இந்த வரைவுத் தீர்மானம் ஏற்கப்பட்டால் உலகம் முழுவதும் என்டோ சல்ஃபானுக்கு முறைப்படி தடை விதிக்கப்படும்.

என் படத்துக்கே தியேட்டர் இல்லை : கருணாநிதி.



தான் எழுதி வெளிவந்துள்ள "பொன்னர்-சங்கர்' திரைப்படத்துக்கே தியேட்டர் கிடைக்கவில்லை' என்று முதல்வர் கருணாநிதி புகார் கூறியுள்ளார்.

இதுகுறித்து, வெள்ளிக்கிழமை அவர் வெளியிட்ட அறிக்கை:

தயாரிக்கப்பட்ட திரைப்படங்களை வெளியிட தியேட்டர்களே கிடைக்கவில்லை யென்று சினிமா வட்டாரங்களில் விமர்சிக்கிறார்கள். என்ன செய்வது? படம் எடுப்பதற்கு ஆள் இல்லாமல், ஸ்டுடியோக்களையும், திரையரங்குகளையும் மூடிவிட்டு அந்த இடங்களை திருமண மண்டபங்களாகவும், ஓட்டல்களாகவும், கிடங்குகளாகவும் மாற்றிடும் நிலைமை ஏற்பட்டது ஒரு காலம். இப்போது படங்களை வெளியிட தியேட்டர் கிடைக்கவில்லை என்று அலைகின்ற ஒரு நிலைமை ஏற்பட்டிருக்கிறது.

நான் எழுதி வெளிவந்துள்ள "பொன்னர் சங்கர்' திரைப்படத்துக்கும் எங்கும் தியேட்டர்கள் கிடைக்கவில்லை. அலையாய் அலைந்துதான் தியேட்டர்களைப் பிடிக்க முடிந்தது என்று அதன் தயாரிப்பாளர்கள் கண்ணீர்விட்ட நிகழ்ச்சிகள் எனக்குத் தெரியும்.

கடலூரில் ஒரு தியேட்டரில் "பொன்னர் சங்கர்' திரைப்படம் திரையிடப்பட்டு அரங்கம் நிறைந்த காட்சிகளாக நடைபெற்றுக் கொண்டிருந்தது. இரண்டாம் நாளே அந்தத் திரைப்படத்தை கட்டாயப்படுத்தி எடுத்து விட்டார்கள் என்றார் அவர்.

வாரிசுகளின் வளர்ச்சியில் அர்த்தம் கற்பிப்பது ஏன்? கருணாநிதி கேள்வி.



என்னுடைய வாரிசுகளின் வளர்ச்சியில் மட்டும் அர்த்தம் கற்பிப்பது ஏன்? என்று முதல்வரும், திமுக தலைவருமான கருணாநிதி கேள்வி எழுப்பியுள்ளார்.

இதுகுறித்து, வெள்ளிக்கிழமை அவர் வெளியிட்ட அறிக்கை:

தொண்டாற்றியும், தொடர்ந்து தியாகங்கள் செய்தும் கட்சியின் தருக்களாக என்னுடைய பிள்ளைகள் அழகிரி, ஸ்டாலின், தமிழரசு ஆகியோர் வளர்ந்துள்ளனர். அவர்களுடைய பிள்ளைகளும் திரையுலகில் பொருளீட்டி புகழ் ஈட்டுவதைப் பொறுத்துக் கொள்ள முடியாத சிலர் எனக்கு நண்பர்களாக இருந்து கொண்டே நச்சுக் கணைகள் பாய்ச்சுவதால் உரிய விளக்கத்தை அளிக்க விரும்புகிறேன்.

1945-ம் ஆண்டு முதல் இதுவரையில் 75-க்கும் மேற்பட்ட திரைப்படங்களுக்கு திரைக்கதை வசனம் எழுதியிருக்கிறேன். இதில் அபிமன்யூ, ராஜகுமாரி, பராசக்தி உள்ளிட்ட ஏராளமான படங்களும் அடக்கம். எனக்கும், திரைப்படக் கலைஞர்கள், இயக்குநர்கள், தயாரிப்பாளர்கள், இசைவாணர்கள், கவிஞர்கள், தொழிலாளர்கள் அனைவருடனும் இருந்த தொடர்புகளையும், இருக்கின்ற தொடர்புகளையும் திரையுலகத்தினர் தெளிவாகப் புரிந்தவர்கள் என்பதை மறந்திருக்க முடியாது.

"கருணாநிதியின் பேரன், பேத்திகள் எல்லாம் சினிமா படம் எடுக்கிறார்களே, எப்படி?' எனக் கேள்வி எழுப்பி ஒரு புத்தகத்தில் கட்டுரை எழுதப்பட்டுள்ளது. ஏ.வி.மெய்யப்ப செட்டியார் திரைப்படம் எடுத்து, பின்னர் அவருடைய மகன்கள் ஏ.வி.எம். முருகன், ஏ.வி.எம். குமரன், ஏ.வி.எம்.பாலசுப்பிரமணியம், ஏ.வி.எம்.சரவணன், அவருடைய மகன் குகன், மருமகள் நித்யா போன்றவர்கள் எல்லாம் திரைப்படத் துறையிலே இருப்பதும்,

நடிகர் சிவாஜிக்குப் பிறகு அவருடைய மகன்கள் ராம்குமார், பிரபு, ராம்குமாரின் மகன் துஷ்யந்த் போன்றவர்கள் திரைப்படத் துறையில் ஈடுபட்டதும், நடிகர் ரஜினி, அவருடைய மகள் ஐஸ்வர்யா, மருமகன் தனுஷ் ஆகியோர் திரைப்படத் துறையில் இருப்பதும், நடிகர் கமல், அவருடைய சகோதரர் சாருஹாசன், மகள் ஸ்ருதி, சுகாசினி, மணிரத்னம், அனுஹாசன் போன்றவர்கள் இந்தத் துறையில் ஈடுபட்டு இருப்பதும், தயாரிப்பாளர் ஆர்.பி.சௌத்ரி மற்றும் அவருடைய பிள்ளைகள், ஜீவா, ஜித்தன் ரமேஷ் போன்றவர்கள் இருப்பதும், நடிகர் சிவக்குமார், அவருடைய பிள்ளைகள் சூர்யா, கார்த்தி ஆகியோர் திரைப்படத் துறையில் ஈடுபட்டுள்ளனர். இவையெல்லாம் மற்றவர்களுக்குத் தெரியாமல் போனது வேடிக்கை. அதுமாத்திரம் அல்ல; கடந்த காலத்தில் எத்தனை படத் தயாரிப்பாளர்கள் படங்களைத் தயாரித்து அதனை முடிக்க முடியாமல் தற்கொலை செய்து கொண்டார்கள்; எத்தனை பேர் படம் எடுத்த காரணத்தினாலேயே ஓட்டாண்டியாகி தெருவிலே நின்றார்கள் என்பதையெல்லாம் கவிஞர் கண்ணதாசன் புத்தகமாக எழுதியுள்ளார்.

என் குடும்பத்தில்...:

என் குடும்பத்திலே என்னுடைய பிள்ளைகளோ, பெண்களோ, பேரர்களோ அரசியலிலே ஈடுபட்டால் வாரிசு அரசியல் என்பதற்கும்-திரைப்படத் துறையிலே ஈடுபட்டால் அதற்கு அர்த்தம் கற்பிப்பதற்கும் என்னதான் காரணமோ? ஏன்தான் இந்த நெஞ்செரிச்சலோ? என்று முதல்வர் கருணாநிதி கேள்வி எழுப்பியுள்ளார்.

ஸ்கேன் பரிசோதனையில் சிக்கினார் : 220 கிராம் தங்க பிஸ்கெட்டை வயிற்றில் விழுங்கி கடத்தல் ; விமான நிலையத்தில் வாலிபர் கைது.

ஸ்கேன் பரிசோதனையில் சிக்கினார்:   220 கிராம் தங்க பிஸ்கெட்டை    வயிற்றில் விழுங்கி கடத்தல்;    விமான நிலையத்தில் வாலிபர் கைது

சென்னை விமான நிலையத்திற்கு நேற்று இரவு கொழும் பில் இருந்து ஒரு விமானம் வந்தது. அதில் இருந்து இறங்கிய பயணிகளிடம் சுங்க இலாகா அதிகாரிகள் சோதனை நடத்தினார்கள். அப்போது ராமநாதபுரத்தைச் சேர்ந்த பரூக் காந்தர் சித்திக் (35) என்பவரிடம் அதிகாரிகள் விசாரணை நடத்தினர். அப்போது அவர் முன்னுக்கு பின் முரணாக பதில் அளித்தார்.

இதில் சந்தேகம் அடைந்த அதிகாரிகள் அவரது உடலை ஸ்கேன் மூலம் பரிசோதனை செய்தனர். அப்போது அவரது வயிற்றில் சில பொருட்கள் இருப்பது தெரிய வந்தது.

இதையடுத்து அவருக்கு “இனிமா” மருந்து கொடுக்கப்பட்டு வயிற்றில் இருந்த பொருட்கள் எடுக்கப்பட்டன. அதிகாரிகள் அதை பார்த்த போது அதிர்ச்சி அடைந்தனர். ஆணுறையில் 220 கிராம் எடையுள்ள 5 தங்க பிஸ்கெட்டுகள் இருந்தன. இதன் மதிப்பு ரூ. 6 லட்சம் ஆகும். இதையடுத்து விமான நிலைய போலீசார் சித்திக்கை கைது செய்தனர். அவரிடம் இருந்து தங்க பிஸ்கெட்டுகளை பறிமுதல் செய்தனர். அவரிடம் போலீசார் தொடர்ந்து விசாரித்து வருகிறார்கள்.

ஏர் இந்தியா விமானிகள் வேலை நிறுத்தத்தை கைவிட மறுப்பு.

ஏர் இந்தியா விமானிகள் வேலை நிறுத்தத்தை கைவிட மறுப்பு


ஏர் இந்தியா விமானிகள் வேலைநிறுத்தம் இன்று 3-வது நாளாக நீடிக்கிறது. இதனால் விமான போக்குவரத்து கடுமையாக பாதிக்கப்பட்டுள்ளது. வழக்கமாக இயக்கப்படும் 320 விமானங்களில் 50 விமானங்கள் மட்டுமே இன்று இயக்கப்படுகிறது. இதனால் விமான பயணிகள் கடும் அவதிக்குள்ளாகி உள்ளனர்.

மேலும் விமானிகள் உடனடியாக வேலை நிறுத்தத்தை வாபஸ் பெறவேண்டும் என டெல்லி ஐகோர்ட்டு கூறியது. ஆனால் தங்கள் கோரிக்கை தொடர்பாக சுப்ரீம் கோர்ட்டை அணுகப் போவதாக விமானிகள் சங்கம் தெரிவித்திருந்தது.

இதற்கிடையே விமானிகள் வேலைநிறுத்தத்தால் இன்று முதல் 5 நாட்களுக்கு டிக்கெட் முன்பதிவை நிறுத்தி வைக்க ஏர் இந்தியா நிறுவனம் முடிவு செய்துள்ளது. டிக்கெட் முன்பதிவு மே 4-ந்தேதி முதல் தொடங்கும் என அறிவிக்கப்பட்டுள்ளது.

இந்நிலையில் டெல்லி ஐகோர்ட்டு அறிவுறுத்தலின்படி இன்று மாலை 5 மணிக்குள் விமானிகள் பணிக்கு திரும்ப வேண்டும் என்று ஏர் இந்தியா நிர்வாகம் கெடு விதித்திருந்தது ஆனால் விமானிகள் அதனை ஏற்க மறுத்துவிட்டனர்

இதனைதொடர்ந்து வேலை நிறுத்தத்தை கைவிடாத விமானிகள் மீது கோர்ட்டு அவமதிப்பு வழக்கு தொடரப்படும் என்று டெல்லி ஐகோர்ட்டு இன்று உத்தரவிட்டது. ஆனால், தாங்கள் வேலை நிறுத்தத்தை கைவிடப்போவதில்லை என்றும், கோர்ட்டு தங்களுக்கு தண்டனை வழங்கினால் அதை ஏற்று சிறைக்கு செல்லவும் தயார் என்றும் விமானிகள் சங்க நிர்வாகிகள் இன்று மாலை அறிவித்தனர்.

தங்கம் விலை : ஒரே மாதத்தில் ரூ. 1,080 உயர்வு.


ஆபரணத் தங்கத்தின் விலை கடந்த ஒரு மாதத்தில் மட்டும் ரூ. 1,080 உயர்ந்துள்ளது.

சென்னையில் கடந்த மார்ச் 30-ம் தேதி ஒரு பவுன் ஆபரணத் தங்கம் ரூ. 15 ஆயிரத்து 464 என்ற விலையில் விற்பனை ஆனது. அடுத்த 30 நாள்களில் ரூ. 1,080 விலை அதிகரித்து, ஏப்ரல் 29-ம் தேதி (வெள்ளிக்கிழமை) ஒரு பவுன் ரூ. 16, 544 என்ற விலையில் விற்பனையானது. ஒரு கிராம் ரூ.2,068.

வியாழக்கிழமை விலை:

ஒரு பவுன்: ரூ.16,552.

ஒரு கிராம்: ரூ.2,069.

பறவைகள் சரணாலயம், தர்காவில் சூரிய ஆற்றல் மின்சாரம்.


சூரிய ஆற்றல் மின்சாரத்தைப் பயன்படுத்துவதில் ராஜஸ்தான் மாநிலம் முன்னோடியாக வளர்ந்து வருகிறது. முதல் கட்டமாக மாநிலத்தில் உள்ள பரத்பூர் பறவைகள் சரணாலயத்திலும், ஹஜ்ரத் மொய்னுதீன் கிஸ்தி தர்காவிலும் சூரிய மின்னாற்றலைப் பயன்படுத்த முடிவு செய்துள்ளது.

மாநிலத்தில் அபரிமிதமாகக் கிடைக்கும் சூரிய ஆற்றலை உரிய வகையில் பயன்படுத்திக் கொள்ள மாநில அரசு திட்டமிட்டுள்ளது. ஏற்கெனவே ஆஜ்மீரில் உள்ள ஹஜ்ரத் மொய்னுதீன் தர்காவில் இதற்கான சூரிய ஒளிப் பலகைகள் நிர்மாணிக்கப்பட்டுள்ளன.

இதேபோல பரத்பூரில் உள்ள கியோலெடோ தேசிய பூங்காவிலும் சூரிய ஒளி மூலமான மின் பலகைகள் அமைக்க முடிவு செய்யப்பட்டுள்ளது. இதேபோல சுற்றுலாப் பயணிகள் அதிகம் வரும் சித்தூர்கர் கோட்டையிலும் சூரிய மின்னாற்றல் பலகைகள் நிறுவ மாநில அரசு ஏற்பாடு செய்து வருகிறது.

ஆஜ்மீர் தர்காவில் 20 கிலோவாட் சூரிய ஆற்றல் மின்னுற்பத்தி பலகைகள் நிறுவப்பட்டுள்ளன. இதனால் சூரியன் மறைந்தபிறகு 6 மணி நேரத்திற்கு இங்குள்ள மின் விளக்குகள் செயல்படும். அத்துடன் இங்கு வரும் பக்தர்களுக்கு வெந்நீர் அளிப்பதற்கு சூரிய ஒளியில் இயங்கும் 500 லிட்டர் மற்றும் 1,500 லிட்டர் கொள்ளளவு கொண்ட வாட்டர் ஹீட்டர்களும் நிறுவப்பட்டுள்ளன. முன்னர் வெந்நீருக்கு மின்சார வாட்டர் ஹீட்டர்கள் பயன்படுத்தப்பட்ன. சிலசமயங்களில் மரக்கட்டைகள் பயன்படுத்தப்பட்டதாக மரபுசாரா எரிசக்தித்துறை நிறுவன அதிகாரி ஆர்.ஆர். செüத்ரி தெரிவித்தார்.

பரத்பூரில் உள்ள தேசிய பூங்கா, உலக புராதான சின்னமாக அறிவிக்கப்பட்டுள்ளது. இந்த பூங்காவில் நீர் இறைக்கப் பயன்படும் மோட்டாருக்குத் தேவையான மின்சாரம் சூரிய ஆற்றல் மூலம் கிடைக்கிறது. இங்குள்ள குளத்தில் நீர் எப்போதும் இருப்பதால் பறவைகள் எப்போதும் இங்கு இருந்துகொண்டேயிருக்கும். குளத்திலிருந்து நீரை இறைக்கும் மோட்டார்களும் சூரிய ஆற்றளில் செயல்படுபவையாகும். இவை தவிர, அலுவலகம், கண்காட்சியகம் ஆகியவற்றில் உள்ள மின் சாதனங்களுக்குத் தேவையான மின்சாரம் சூரிய ஆற்றல் மூலம் வழங்கப்படுகிறது. இதற்காக 8 கிலோவாட் சூரிய ஆற்றல் மின்னுற்பத்தி மையம் அமைக்கப்பட்டுள்ளது. பரத்பூர் சரணாலயத்தில் ரூ. 1 கோடி செலவிலான பணிகள் இந்த ஆண்டு அக்டோபரில் நிறைவடையும்.

இந்த சரணாலயத்துக்கு மிகவும் அரிய வகை பறவைகளான சைபீரிய கொக்கு உள்ளிட்ட 230 வகை பறவைகள் வந்து செல்கின்றன. இந்த பூங்காவைச் சுற்றிப் பார்க்க பேட்டரியில் இயங்கும் 2 கார்கள் பயன்படுத்தப்படுகின்றன. ராஜஸ்தானில் பல்வேறு பகுதிகளில் சூரிய ஆற்றலைப் பயன்படுத்துவதற்கு அமைச்சரவை ஒப்புதல் அளித்துள்ளது குறிப்பிடத்தக்கது.

நிர்வாகத்தை தனியாரிடம் ஒப்படைக்கும் திட்டம் : தபால் ஊழியர்கள் 2-வது நாளாக வேலை நிறுத்தம்.

நிர்வாகத்தை தனியாரிடம் ஒப்படைக்கும் திட்டம்: தபால் ஊழியர்கள் 2-வது நாளாக வேலை நிறுத்தம்

தபால் துறை நிர்வாகத்தை தனியாரிடம் ஒப்படைக்கும் திட்டத்தை கைவிடக்கோரி, சென்னையில் உள்ள பொது தலைமை தபால் நிலைய (ஜி.பி.ஓ.) தபால் பட்டுவாடா ஊழியர்கள் நேற்று 2-வது நாளாக வேலைநிறுத்தத்தில் ஈடுபட்டதால், மாணவர்களின் ரிசல்ட், அனுமதி கடிதங்கள் மலைபோல் குவிந்துள்ளன.

சென்னை ராஜாஜி சாலையில் கடற்கரை ரெயில் நிலையத்துக்கு எதிரே பொது தபால் நிலையம் (ஜி.பி.ஓ.) செயல்படுகிறது. இது நூறு ஆண்டுகளுக்குமேல் தபால் சேவையில் ஈடுபட்டுள்ளது.

தற்போது, சென்னை மாவட்ட கலெக்டர் அலுவலகம், பள்ளிக்கூடங்கள், கல்லூரிகள், துறைமுகம், ரிசர்வ் வங்கி, வர்த்தக நிறுவனங்கள் உள்ளிட்ட தபால் சேவை ஜி.பி.ஓ.வின் மூலமாகத்தான் நடைபெறுகின்றன.

இங்கு சாதாரண தபால், துரித தபால் (ஸ்பீடு போஸ்டு), பதிவுத்தபால், மணியார்டர் பட்டுவாடாவில், நூற்றுக்கும் மேற்பட்ட ஊழியர்கள் பணியாற்றுகிறார்கள். கடந்த 26-ந் தேதி வரையில் தபால் பட்டுவாடாவில் எந்த தொய்வும் ஏற்படவில்லை.

28-ந் தேதியில் இருந்து பட்டுவாடா ஊழியர்கள் திடீர் வேலைநிறுத்தத்தில் ஈடுபட்டனர். இந்த வேலை நிறுத்தம் 2-வது நாளாக நேற்றும் தொடர்ந்தது. தபால் ஊழியர்களின் வேலை நிறுத்தம் காரணமாக, ஜி.பி.ஓ.வில், தபால்கள், குறிப்பாக மாணவர்களின் தேர்வு முடிவுகள், புதிய சேர்க்கைக்கான அனுமதிக்கடிதங்கள், திருமண பத்திரிகைகள், வர்த்தக நிறுவனங்களுக்கான தபால்கள், வங்கிகளுக்கான தபால்கள் மலை போல் குவிந்துள்ளன. முதியோர் பென்சன் தொகைக்கான மணியார்டர்களும் தேங்கி கிடக்கின்றன.

Friday, April 29, 2011

இலங்கையில் மேட்ச் பிக்ஸிங் : ஹசான் திலகரத்ன குற்றச்சாட்டு.


இலங்கை கிரிக்கெட்டில் 1992-ம் ஆண்டில் இருந்து மேட்ச் பிக்ஸிங் எனப்படும் சூதாட்டம் நடப்பது சாதாரணமானதுதான் என அந்நாட்டின் முன்னாள் கேப்டன் ஹசான் திலகரத்ன கூறியுள்ளார்.

சூதாட்டங்களில் ஈடுபட்டவர்களின் பெயர்களை விரைவில் வெளியிடுவேன் என்று அவர் உறுதிபடக் கூறினார்.

மேட்ச் பிக்ஸிங் இன்று, நேற்று தொடங்கியதல்ல. எனக்குத் தெரிந்தவரை, 1992-ம் ஆண்டில் இருந்து அது நடைபெறுகிறது. பொறுப்புணர்ச்சியுடன் இதைக் கூறுகிறேன் என திலகரத்ன குறிப்பிட்டார்.

ஏப்ரல் 2003 மற்றும் மார்ச் 2004-க்கு இடைப்பட்ட காலத்தில் திலகரத்ன இலங்கை அணியின் கேப்டனாக இருந்தார்.

சூதாட்டத்தில் ஈடுபட்டுள்ளவர்கள் பணபலத்தால் இந்த விவகாரத்தை வெற்றிகரமாக மறைத்துவிடுகிறார்கள். அவர்களின் பெயர்களை விரைவில் வெளியிடுவேன் என திலகரத்ன குறிப்பிட்டார்.

தற்போது இந்தியாவுடனான உலகக் கோப்பை இறுதிப் போட்டியில் மேட்ச் பிக்ஸிங் நடந்ததாகக் கூறமுடியாது. ஆனாலும் இலங்கையில் மேட்ச் பிக்ஸிங் சூதாட்டம் புற்றுநோயைப் போல பரவிவிட்டது.

உலகக் கோப்பை போட்டியில் ஏன் 4 வீரர்களை மாற்றினார்கள். அதுகுறித்து கேள்விகள் எழுப்பப்பட வேண்டும். மெந்திஸை ஏன் மாற்றிவிட்டு மற்றொருவரைக் கொண்டுவந்தார்கள். கபுகெடர ஒருபோதும் ரன்களே எடுக்கவில்லை. ஆனால் சமரசில்வாவுக்கு பதிலாக அவரைத் தேர்ந்தெடுத்தனர். அது நியாயமில்லை என திலகரத்ன தெரிவித்தார்.

உலகக் கோப்பை அணி தேர்ந்தெடுக்கப்பட்ட காலகட்டம் குறித்தும் அவர் சந்தேகம் தெரிவித்தார்.

ஜனவரி 7-ம் தேதி உலகக் கோப்பை அணி தேர்வுசெய்யப்பட்டது. ஐபிஎல் ஏலம் ஜனவரி 8-ம் தேதி நடைபெற்றது. ஐபிஎல் ஏலத்துக்கு ஒருநாள் முன்பாக ஏன் இலங்கை அணி தேர்வுசெய்யப்பட்டது என நான் டிவி நிகழ்ச்சி ஒன்றில் கேள்வி கேட்டிருந்தேன்.

இலங்கை கிரிக்கெட் வாரியம் ஜனவரி 11, 12, 13-ம் தேதிகளில் மாகாண கிரிக்கெட் போட்டிகளை நடத்தி இருந்தால் அந்த போட்டிகளை பார்த்து சிறந்த வீரர்களை தேர்ந்தெடுத்திருக்கலாம். அவ்வாறு செய்திருந்தால் அணியில் இடம்பெற்ற 2, 3 வீரர்களுக்கு பதிலாக வேறு சில வீரர்கள் கிடைத்திருப்பார்கள் என நம்புகிறேன். உலகக் கோப்பைக்கு தேர்ந்தெடுக்கப்பட்ட அணி சிறந்த அணிதானா என்பதில் சந்தேகம் உள்ளது. ஏன் ஐபிஎல்லுக்கு முன்பாக அணி வீரர்கள் தேர்வுசெய்யப்பட்டனர். இதுகுறித்து விசாரிக்க வேண்டும் என அவர் குறிப்பிட்டார்.


சேலம்: லஞ்சம் வாங்கிய தனி துணை ஆட்சியர் கைது.


சேலத்தில் ரூ.8000 லஞ்சம் வாங்கிய தனி துணை ஆட்சியர் கைது செய்யப்பட்டார்.

சேலத்தில் நில அளவைகள் துறையில் தனித் துணை ஆட்சியராக இருப்பவர் பொன்னுசாமி. இவருடைய உதவியாளர் பத்மநாபன். இவர்கள் இருவரும், பெங்களூரைச் சேர்ந்த ஸ்ரீனிவாசன் என்பவரிடம் சொத்து மதிப்பைக் குறைத்துக் காட்டுவதற்காக லஞ்சம் கேட்டார்களாம்.

இந்நிலையில் ஸ்ரீனிவாசன் சேலம் லஞ்ச ஒழிப்புத்துறை போலீஸாரிடம் புகார் தெரிவித்தார்.

அவர்களின் ஆலோசனைப் படி, இன்று காலை தனித் துணை ஆட்சியர் பொன்னுசாமியும் உதவியாளர் பத்மநாபனும் ரூ.8 ஆயிரம் லஞ்சம் பெற்ற போது, சந்திரமௌலி தலைமையில் சென்ற லஞ்ச ஒழிப்புப் போலீஸார் அவர்கள் இருவரையும் கைது செய்தனர்.

ஸ்டெர்லைட் விவகாரம் : மதிமுக அறிக்கை.


ஸ்டெர்லைட் தொழிற்சாலையில் ஆய்வு மேற்கொண்ட நீரி நிறுவனம், தனது அறிக்கையை வைகோவுக்கு வழங்க வேண்டும் என்று உச்சநீதிமன்றம் உத்தரவிட்டுள்ளதாக மதிமுக தெரிவித்துள்ளது.

இதுகுறித்து அக்கட்சி இன்று வெளியிட்டுள்ள அறிக்கையில் கூறியிருப்பதாவது:

சுற்றுச்சூழலுக்கு நாசம் விளைவிக்கும், ஸ்டெர்லைட் தாமிர உருக்கு ஆலை, தூத்துக்குடியில் அமைக்கப்பட்டு இருப்பதை எதிர்த்து, பல்வேறு போராட்டங்கள் நடைபெற்று, சென்னை உயர்நீதிமன்றத்திலும் வைகோ வழக்குத் தொடுத்து இருந்தார். உயர்நீதிமன்றம், ஆலையை நிரந்தரமாக மூடுமாறு, 2010 செப்டம்பர் 28 ஆம் நாள் ஆணை பிறப்பித்து இருந்தது.

அதனை எதிர்த்து, உச்சநீதிமன்றத்தில் ஸ்டெர்லைட் நிறுவனம் வழக்குத் தொடுத்தது. ஆலையை நிரந்தரமாக மூடுமாறு வைகோவும் உச்சநீதிமன்றத்தில் வழக்குத் தொடுத்து உள்ளார். நாக்பூர் நீரி நிறுவனம், ஸ்டெர்லைட் ஆலையில் சுற்றுச்சூழல் ஆய்வு மேற்கொண்டு, அதன் அறிக்கையை எட்டு வாரங்களுக்குள் உச்ச நீதிமன்றத்துக்குத் தர வேண்டும் என்று, கடந்த பிப்ரவரி 25-ம் தேதி உச்சநீதிமன்றம் ஆணையிட்டது.

இன்று அந்த வழக்கு விசாரணைக்கு எடுத்துக் கொள்ளப்பட்டது. நீரி நிறுவனம், ஆய்வு அறிக்கையை உச்சநீதிமன்றத்தில் வழங்கவில்லை.

இதுகுறித்து, உச்சநீதிமன்றத்தில் வைகோ தெரிவித்ததாவது:

உச்சநீதிமன்றம் ஆணையிட்டு 40 நாள்களுக்குப் பின்னர்தான் ஸ்டெர்லைட் ஆலைக்கு, நீரி நிறுவனம் ஆய்வுக்கு வந்தது. முதல் சுற்று ஆய்வு, ஏப்ரல் 6, 7, 8, தேதிகளில் நடைபெற்றது. இரண்டாவது சுற்று ஆய்வு, ஏப்ரல் 19, 20, 21 தேதிகளில் நடைபெற்றது.

உச்சநீதிமன்றம் அறிவுறுத்தியதற்கு இணங்க, எனக்கும் தகவல் தரப்பட்டு, நானும் ஆய்வின்போது உடன் இருந்தேன். ஆய்வு அறிக்கையை, நீரி தந்தபின், அதனுடைய பிரதிகள் எனக்கும் வழங்கப்பட வேண்டும்; அந்த அறிக்கையின் மீதான எனது கருத்துகளை, உச்சநீதிமன்றத்தில் பதிவு செய்ய வாய்ப்பு அளிக்க வேண்டும் என்று வைகோ கேட்டுக் கொண்டார்.

அதற்கு நீதியரசர்கள், ரவீந்திரன், பட்நாயக் ஆகியோர், ‘நீரி நிறுவனம் அறிக்கையை உச்ச நீதிமன்றத்தில் தாக்கல் செய்வதற்கு, தமிழ்நாடு அரசும், தமிழ்நாடு மாசு கட்டுப்பாடு வாரியமும் உடன் இருந்து ஏற்பாடு செய்ய வேண்டும்; அந்த அறிக்கையின் பிரதி, வைகோவுக்கும் வழங்கப்பட வேண்டும்; அதன்பின்னர் வைகோ தன்னுடைய கருத்துகளை இந்த நீதிமன்றத்தில் தாக்கல் செய்யலாம் என்றும், வழக்கு ஜூலை மூன்றாம் வாரத்துக்கு ஒத்தி வைக்கப்படுவதாகவும் அறிவித்தனர்.

இந்த வழக்கு விசாரணையின்போது, மதிமுக சட்டத்துறைச் செயலர்கள் வழக்கறிஞர் தேவதாஸ், தில்லியில் மதிமுக வழக்கறிஞர் பாலாஜியும் உடன் இருந்தனர்.

இவ்வாறு மதிமுக வெளியிட்டுள்ள அறிக்கையில் தெரிவிக்கப்பட்டுள்ளது.


பி.டி. கத்தரிக்காயை அனுமதிக்க கூடாது : ராமதாஸ்.


மரபணு மாற்றம் செய்யப்பட்ட கத்தரிக்காயை இந்தியாவில் விளைவிக்கவும், விற்பனை செய்யவும் அனுமதி அளிக்கக்கூடாது என்று பாமக நிறுவனர் ராமதாஸ் வலியுறுத்தியுள்ளார்.

இதுகுறித்து அவர் இன்று வெளியிட்டுள்ள அறிக்கையில் கூறியிருப்பதாவது:

மரபணு மாற்றம் செய்யப்பட்ட கத்தரிக்காயால் பொதுமக்களுக்கும் வேளாண் நிலங்களுக்கும் எந்த பாதிப்பும் ஏற்படாது என்பது உறுதி செய்யப்பட்ட பிறகுதான் அந்த கத்தரிக்காய்க்கு அனுமதி அளிக்கப்படும் என்று மத்திய சுற்றுச்சூழல் அமைச்சர் ஜெய்ராம் ரமேஷ் கூறியிருந்தார்.

இந்நிலையில், ஏற்கெனவே செய்யப்பட்ட ஆய்வுகளே போதுமானது என்று கூறி மரபணு கத்தரிக்காய்க்கு அனுமதி அளிக்க மத்திய அரசின் வல்லுநர் குழு முடிவு செய்திருப்பதாக வந்துள்ள செய்தி அதிர்ச்சி அளிக்கிறது.

விளைச்சலை அதிகரிப்பதற்காக பொதுமக்களின் உடல்நலனுக்கு தீங்கு ஏற்பட அனுமதிக்க கூடாது.

வேளாண் விளைச்சலை அதிகரிக்க முயற்சி என்ற பெயரில் மரபணு மாற்றம் செய்யப்பட்ட கத்தரிக்காய்க்கு அனுமதி வழங்குவது என்பது, இந்திய விவசாயிகளின் நலனை புறக்கணித்துவிட்டு பன்னாட்டு நிறுவனங்களுக்கு வெண்சாமரம் வீசும் செயலாகவே இருக்கும்.

இந்தியாவில், மரபணு மாற்றம் செய்யப்பட்ட கத்தரிக்காய் அறிமுகப்படுத்துவதை மத்திய அரசு தடுத்து நிறுத்த வேண்டும்.இவ்வாறு ராமதாஸ் தனது அறிக்கையில் தெரிவித்துள்ளார்.

தகவலறியும் உரிமைச் சட்டம்: வருமான வரி கணக்கு விவரங்களை தெரிவிக்க கனிமொழி - ராசா மறுப்பு.


தகவலறியும் உரிமைச் சட்டத்தின் கீழ் வருமான வரி கணக்கு விவரங்களைத் தெரிவிக்க முன்னாள் மத்திய தொலைத் தொடர்புத்துறை அமைச்சர் ஆ.ராசாவும், திமுக எம்பி கனிமொழியும் மறுத்துவிட்டனர்.

சென்னையைச் சேர்ந்த வி.கோபாலகிருஷ்ணா என்பவர் திருச்சியில் உள்ள வருமான வரித் துறை துணை கமிஷனர் அலுவலகத்தில் தகவலறியும் சட்டத்தின் கீழ் மனு ஒன்றைத் தாக்கல் செய்தார்.

அதில், ஆ.ராசா, அவரது மனைவி எம்.ஏ. பரமேஸ்வரி ஆகியோர் 2001ம் ஆண்டு முதல் 2011 ஆண்டு வரை தாக்கல் செய்த வருமான வரி கணக்கு விவரங்களைக் கோரியிருந்தார்.

இந்த மனு டெல்லி திகார் சிறையில் உள்ள ராசாவுக்கு அனுப்பப்பட்டது. இதையடுத்து ராசாவின் சார்பில் முத்துகுமாரசாமி என்பவர் அளித்த பதிலில், தனிப்பட்ட விவரங்களை மனுதாரர் கோரியுள்ளதால், அவற்றை வழங்க முடியாது. தகவலறியும் உரிமைச் சட்டத்திலிருந்து இந்த விவரங்களை வழங்க விலக்கு அளிக்கப்பட்டுள்ளது என்று கூறப்பட்டுள்ளது.

இதைக் காரணம் காட்டி கோபாலகிருஷ்ணாவின் தகவல் கோரும் மனுவை வருமான வரித்துறை நிராகரித்துவிட்டது.


அதே போல கனிமொழியின் வருமான வரி விவரங்களைக் கோரி கோபால கிருஷ்ணா சென்னை வருமான வரி அலுவலகத்தில் மனு செய்தார்.

ஆனால், வருமான வரி விவரங்கள் ரகசியமானவை என்பதால் அதை வெளியில் சொல்லக் கூடாது என்று கனிமொழி ஆட்சேபம் தெரிவித்துவிட்டார். இதையடுத்து அந்த விவரத்தை அளிக்க முடியாது என்று வருமான வரித்துறை கூறிவிட்டது.

கங்கையை சுத்தப்படுத்த ரூ 7000 கோடி : மத்திய அமைச்சரவை ஒப்புதல்!


கங்கையை சுத்தப்படுத்தும் ரூ 7000 கோடி திட்டத்துக்கு மத்திய அமைச்சரவை ஒப்புதல் அளித்தது.

இந்துக்களின் புண்ணிய நதியாக கருதப்படும் கங்கை நதியில் பல்வேறு மனித சடலம் உள்பட பல கழிவுகள் சேருவதால் மாசடைந்து வருகிறது.

புனித நதியான கங்கையை தூய்மை படுத்துமாறு பல்வேறு தரப்பினரும் வலியுறுத்தியதை தொடர்ந்து கடந்த 2009-ம் ஆண்டில், 'தேசிய கங்கை நதி கழிமுக ஆணையம்' அமைக்கப்பட்டது. ஆணையத்தின் தலைவராக பிரதமர் நியமிக்கப்பட்டார்.


கங்கை நதியைச் சுத்தப்படுத்துவதற்கான திட்டம், செலவு, கண்காணிப்பு, ஒருங்கிணைப்பு போன்ற பணிகளை மேற்கொள்ள ஆணையத்துக்கு அதிகாரம் வழங்கப்பட்டுள்ளது.

மேலும் சுற்றுச்சூழல் சட்டத்தின் கீழ் இந்த ஆணையம் அமைக்கப்பட்டது. இந்த நிலையில், ரூ.7 ஆயிரம் கோடி திட்ட மதிப்பில் கங்கை நதியை தூய்மைப் படுத்துவதற்கு பொருளாதார விவகாரங்களுக்கான மத்திய மந்திரிசபை இன்று ஒப்புதல் அளித்தது. இதைத் தொடர்ந்து, அடுத்த 8 ஆண்டுகளுக்குள் இந்த திட்டம் நிறைவேற்றத்தை இலக்கு நிர்ணயிக்கப்பட்டுள்ளது.

திமுக கூட்டணியே ஆட்சியமைக்கும்!-தலைகீழானது ஹெட்லைன்ஸ் டுடே கருத்துக் கணிப்பு.

தேர்தலுக்கு முன்புவரை 'அதிமுகதான் ஜெயிக்கும், ஜெ முதல்வராவார்' என கூறிய இந்தியா டுடே குழுமத்தின் ஹெட்லைன்ஸ் டுடே தொலைக்காட்சி, இப்போது நிலைமை திமுகவுக்கே சாதகமாக உள்ளதாகக் கூறியுள்ளது.

ஹெட்லைன்ஸ் டுடேயும் ஓஆர்ஜி நிறுவனமும் இணைந்து தேர்தலுக்குப் பின் நடத்திய கருத்துக் கணிப்பின் முடிவுகள் வெளியாகியுள்ளன.

மே 10ம் தேதி வரை கருத்துக் கணிப்பு வெளியிட தேர்தல் ஆணையம் தடை விதித்திருப்பதால், எக்ஸிட் போல் எனும் தேர்தலுக்குப் பிந்தைய கருத்துக் கணிப்பை நடத்தவில்லை என்றும், வாக்களித்த மக்களிடம் கருத்துக் கேட்டு அதன் அடிப்படையில் இந்த முடிவுகளை வெளியிட்டிருப்பதாகவும் ஹெட்லைன்ஸ் டுடே தெரிவித்துள்ளது.

தமிழகத்தில் தேர்தல் முடிந்த இரு தினங்களில் 6000 வாக்காளர்களைச் சந்தித்து இந்த கருத்துக் கணிப்பை நடத்தியுள்ளனர். 2009 நாடாளுமன்றத் தேர்தலை அடிப்படையாகக் கொண்டு இந்த சர்வே எடுக்கப்பட்டுள்ளது.

அதில், திமுக கூட்டணி 130 தொகுதிகள் வரை வெல்லும் என்றும் அதிமுக கூட்டணி 105 முதல் 120 தொகுதிகள் வரை கிடைக்க வாய்ப்புள்ளது என்றும் தெரியவந்துள்ளது.

திமுக மட்டும் தனியாக 90 தொகுதிகளுக்கு மேல் வெல்லும் வாய்ப்புள்ளதாகவும் இதில் தெரிய வந்துள்ளது.

இதுகுறித்து ஹெட்லைன்ஸ் டுடே கூறியிருப்பதாவது:

"இந்தத் தேர்தலில் ஜெயித்து முதல்வராவது அம்மாவா, கலைஞரா? இதை அதிகாரப்பூர்வமாகத் தெரிந்து கொள்ள இன்னும் 15 நாட்கள் உள்ளன. ஆனால், இந்தியா டுடே- ஓஆர்ஜி இணைந்து மேற்கொண்ட தேர்தலுக்குப் பிந்தைய கருத்துக் கணிப்பில் திமுகவின் கையே ஓங்கியிருப்பது தெரியவந்துள்ளது. அதிமுக ஆட்சியமைக்க வாய்ப்பில்லை என்பதும் தெரிகிறது.

தேர்தலுக்கு கடைசி பதினைந்து நாளில், அதிமுகவை விட சிறப்பாக தேர்தல் பணியாற்றியதோடு, மக்களின் வாக்குகளைக் கவரும் அளவுக்கு சிறப்பாக செயல்பட்டுள்ளது திமுக.

இதன் விளைவு, இந்தத் தேர்தலில் 115 முதல் 130 தொகுதிகள் வரை திமுக கூட்டணிக்கே கிடைக்க வாய்ப்புள்ளது. அதிமுக அணி 105 முதல் 120 தொகுதிகள் வரை பெறக்கூடும். கடந்த தேர்தலை விட 33 முதல் 48 வரையிலான தொகுதிகளை திமுக இழந்தாலும், ஆட்சியைத் தக்கவைத்துக் கொள்ளும் என்பது உறுதியாகியுள்ளது.

ஜெயலலிதா தலைமையிலான அதிமுக அணி, 36 முதல் 51 தொகுதிகள் வரை கூடுதலாகப் பெற்றாலும் ஆட்சியமைக்கும் வாய்ப்பில்லை.

இந்தத் தேர்தலில் சுவாரஸ்மான விஷயம், தேர்தலுக்கு முன்பு எடுத்த கருத்துக் கணிப்பில் 45 சதவீதம் பேர் திமுகவுக்கு ஆதரவாகப் பேசினார்கள். ஆனால் தேர்தலுக்குப் பின் கருத்துக் கணிப்பு நடத்தியபோது, 50 சதவீதத்துக்கும் அதிகமானோர் திமுகவுக்கே வாக்களித்ததாய் கூறியுள்ளனர்.

கிராமப் புறங்களில் 2ஜி, தமிழ் ஈழப் பிரச்சினைகள் எடுபடவில்லை. அங்கே அந்த மக்களின் தேவைகளை யார் சரியான முறையில் நிறைவேற்றினார்கள், நிறைவேற்றுவார்கள் என்பதே பிரதான பிரச்சனையாக இருப்பது இப்போது புரிகிறது. கிராமப் பகுதிகளில் திமுகவுக்கு பெரும் ஆதரவு நிலவுகிறது. அங்கு திமுக 5 சதவீதம் அதிகமாக வாக்குகளைப் பெறும்.

இந்தத் தேர்தலைப் பொறுத்தவரை, மொத்தத்தில் திமுக அணி 3 சதவீத வாக்குகளை கூடுதலாகப் பெறும் வாய்ப்புள்ளது. அதிமுகவுக்கு 7 சதவீத வாக்குகள் கூடுதலாகக் கிடைத்தாலும், கூட்டணி பலமின்மை அவருக்கு பாதகமாக உள்ளது. வைகோவை அவர் கடைசி நேரத்தில் இழந்திருக்கக் கூடாது. குறிப்பாக கடைசி நேரத்தில் அவரை புண்படுத்தி வெளியேற்றியது அதிமுகவுக்கு பெரிய பின்னடைவு. வைகோ இருந்திருந்தால் 3 சதவீத கூடுதல் வாக்குகள் கிடைத்திருக்கும். அது கதையையே மாற்றியிருக்கும்.

இதுவே இந்தத் தேர்தலில் ஆட்சியை மீண்டும் திமுகவிடம் ஒப்படைக்கப் போது மானதாக உள்ளது.

முன்பை விட அதிக தொகுதிகளைப் பெற்றாலும், அதிமுக எதிர்க்கட்சி வரிசை யிலேயே உட்கார வேண்டிய நிலைதான் அடுத்த 5 ஆண்டுகளும்.

கேரளாவில்...

கேரள தேர்தலைப் பொறுத்தவரை இந்த முறை காங்கிரஸ் வெல்வது உறுதியாகி விட்டது. ஆனாலும் இடதுசாரி கூட்டணி 45 முகல் 52 தொகுதிகளிலும், காங்கிரஸ் கட்சி 92 வரையிலான வெற்றி பெற்று ஆட்சியைப் பிடிக்கக் கூடும் என தேர்தலுக்குப் பிந்தைய கருத்துக் கணிப்பில் தெரிய வந்துள்ளது.

அஸ்ஸாமில் தொங்கும் சட்டசபை அமைய வாய்ப்புள்ளது. காங்கிரஸ், இடதுசாரி கட்சிகள் இரண்டுமே சமபலத்தில் உள்ளன. இங்கு ஆட்சியை நிர்ணயிக்கப் போவது பாஜகதான் என்று தெரிவிக்கப்பட்டுள்ளது.

விஜயகாந்தை தாக்கி பிரச்சாரம் செய்ததால் ரஜினி படத்தில் நீக்கப்பட்டீர்களா? வடிவேலு பதில்.


திமுக தலைவர் கலைஞரை, நடிகர் வடிவேலு 29.04.2011 அன்று சந்தித்துப் பேசினார். இச்சந்திப்பின்போது மத்திய அமைச்சர் மு.க.அழகிரி உடன் இருந்தார். இச்சந்திப்புக்குப் பின்னர் செய்தியாளர்களிடம் பேசிய வடிவேலு,

திமுக கூட்டணிக்கு வெற்றி வாய்ப்பு பிரகாசமாக உள்ளது. கருத்துக்கணிப்புகளை விட திமுக கூட்டணி அதிக இடங்களில் வெற்றிபெறும். கடந்த 5 ஆண்டு காலத்தில் பயன் அடைந்தோர் பட்டியல் அதிகமாக இருப்பதால், கலைஞர் அய்யாவின் வெற்றி உறுதி.

மக்களின் எழுச்சியை நான் பார்த்தேன். பிரச்சாரத்தில் 108 ஆம்புலன்ஸ் நுழைந்து போகும்போது மக்கள் ஆரவாரம் செய்தனர். குழந்தைகள் முட்டையை கையில் எடுத்து வந்து காட்டியது போன்றவைகளையெல்லாம் பார்க்கும்போது பயன் அடைந்தவர்கள் ஓட்டே திமுக கூட்டணிக்கு அதிக வெற்றி வாய்ப்பை பெற்று தரும். ஏழை எளிய மக்கள் தங்களது நன்றி கடனை செலுத்தியுள்ளனர்.

இந்த சந்தோஷத்தை பகிர்ந்து கொள்வதற்காக கலைஞர் அய்யாவை இன்று நான் சந்தித்தேன் என்றார்.

கேள்வி: விஜயகாந்தை தாக்கி பிரசாரம் செய்ததால் ராணா படத்தில் இருந்து நீங்கள் நீக்கப்பட்டதாக கூறப்படுகிறதே?

பதில்: ராணா படம், கானா படம் எதில் இருந்து நீக்கினாலும் நான் கவலைப் படவில்லை. மே 13 ந் தேதி மக்கள் ஆதரவு யாருக்கு என்பது தெரியும். அதன் பிறகு எல்லாம் மாறும்.

கேள்வி: அ.தி.மு.க.வுடன் தே.மு.தி.க. கூட்டணி வைத்ததுதான் அதற்கு பின்னடைவு என்று கூறுகின்றீர்களா?

பதில்: பொறுத்து இருந்து பாருங்கள். கலைஞரிடம் தோற்பதற்கு காத்திருப்பவர்கள் எத்தனை பேர் என்பது அப்போது தெரியும் என்றார்.

இத்தாலி மோகத்தால் இந்திய கலாசாரம் தெரியாதவர் சோனியா; ராஜசேகர ரெட்டி மகள் தாக்கு.

இத்தாலி மோகத்தால் இந்திய கலாசாரம்    தெரியாதவர் சோனியா;    ராஜசேகர ரெட்டி மகள் தாக்கு

ஆந்திர மாநிலம் கடப்பா எம்.பி. தொகுதி இடைத் தேர்தலில் ஒய்.எஸ்.ஆர். காங்கிரஸ் கட்சி சார்பில் ஜெகன் மோகன் ரெட்டி போட்டியிடுகிறார். அவரை ஆதரித்து அவரது சகோதரி ஷர்மிளா பிரசாரம் செய்தார். அப்போது அவர் கூறியதாவது:-

எனது தந்தை ராஜசேகர ரெட்டி முதல்வராக இருந்தபோது ஏழைகள் நலனுக்காக பல்வேறு திட்டங்களை தீட்டி செயல் படுத்தினார். அவர் ஏழைகளின் வளர்ச்சிக்காகவே தனது வாழ்க்கையை அர்ப்பணித்தார். அப்படிப்பட்டவரின் மகனான ஜெகன்மோகன் ரெட்டியை ஒழிக்கும் பணியில் சோனியா காந்தியும், ராகுல்காந்தியும் தீவிரமாக ஈடுபட்டு வருகிறார்கள்.

அவர்களால் ஒரு போதும் எனது சகோதரரை தோற்கடிக்க முடியாது. மக்கள் எங்கள் பக்கம்தான் உள்ளனர். என் தந்தை இறந்ததை கேட்டு ஆந்திராவில் 600-க்கும் மேற்பட்டோர் இறந்து போனார்கள். அவர்களது குடும்பத்திற்கு ஜெகன் மோகன் ரெட்டி ஆறுதல் சொல்வதற்கு சோனியா தடை விதித்தார். சோனியாவுக்கு இந்திய கலாசாரம் தெரியாது. அவர் இத்தாலி மோகம் கொண்டவர்.

இந்தியாவை இந்தியர்கள் தான் ஆள வேண்டும். வெளி நாட்டினரிடம் நாட்டை ஒப்படைக்க கூடாது. சோனியாவுக்கு நாட்டு நலன் மீது உண்மையான அக்கறை இருந்தால் ஆந்திராவை கலவர பூமியாக மாற்றி இருப்பாரா? தொடக்கத்திலேயே கடும் நடவடிக்கை எடுத்திருந்தால் ஆந்திராவில் சட்டம்- ஒழுங்கை நன்றாக வைத்திருக்கலாம். இதையெல்லாம் நாட்டு மக்கள் எண்ணிப்பார்க்க வேண்டும்.

இவ்வாறு அவர் கூறினார்.

இயக்குனர் கே.பாலசந்தருக்கு தாதா சாகேப் பால்கே விருது.

இயக்குனர் கே.பாலசந்தருக்கு தாதா சாகேப் பால்கே விருது

இந்திய சினிமாவின் மிக உயரிய விருதான தாதா சாகிப் பால்கே விருதுக்கு தமிழ் திரைப்பட இயக்குனர் கே. பாலசந்தர் தேர்வு செய்யப்பட்டுள்ளார். பத்து லட்சம் ரூபாய் ரொக்க பரிசும், தங்க தாமரை பதக்கமும் அடங்கிய இந்த விருது 2010 ஆண்டுக்காக இவருக்கு வழங்கப்படுகிறது.

கைலாசம் பாலச்சந்தர் என்பவர்தான் கே. பாலசந்தர் எனப் பொதுவாக அழைக்கப் படுகிறார். இவர் மேடை நாடகத் துறையில் இருந்து திரைத்துறைக்கு வந்தவர்.

இவருடைய பெரும்பாலான படங்களில், மனித உறவு முறைகளுக்கு இடையிலான சிக்கல்கள், சமூகப் பிரச்சினைகள் ஆகியவையே கருப்பொருளாய் விளங்கின

மேலும் கே. பாலச்சந்தர் எம்.ஜி.ஆர். நடித்த தெய்வத்தாய் படத்தின் மூலம் கதைவசனம் எழுத ஆரம்பித்தார். ரஜினிகாந்த், கமல்ஹாசன் உள்ளிட்ட முன்னணி நட்சத்திரங்களை அறிமுகப்படுத்தியுள்ளார்.

மிக உயரிய விருதாக கருதப்படும் இந்த விருது அறிவிக்கப்பட்டதும் திரையுலக பிரமுகர்கள் அனைவரும் பாலசந்தருக்கு வாழ்த்துக்கள் தெரிவித்து வருகின்றனர்.

இவர் இயக்கிய இரு கோடுகள்(1969) அபூர்வ ராகங்கள் (1975) தண்ணீர் தண்ணீர் (1981) அச்சமில்லை அச்சமில்லை(1984) உள்ளிட்ட படங்களுக்கு தேசிய விருது கிடைந்துள்ளது. 1987 ஆம் ஆண்டு மத்திய அரசு பத்ம ஸ்ரீ விருது வழங்கியுள்ளது. தமிழ்நாடு, மற்றும் ஆந்திர அரசுகள் பல்வேறு விருதுகள் இவருக்கு வழங்கியுள்ளது.

அபூர்வ ராகங்கள், புன்னகை மன்னன், எதிர் நீச்சல், வறுமையின் நிறம் சிகப்பு, உன்னால் முடியும் தம்பி முதலியன இவர் இயக்கிய சிறந்த படங்களில் சிலவாகும்.

கையளவு மனசு போன்ற பெரும் வரவேற்பை பெற்ற தொலைக்காட்சித் தொடர்களையும் இயக்கினார்.

"கவிதாலயா" என்னும் திரைப்படத் தயாரிப்பு நிறுவனத்தையும் நிறுவினார். இதன் மூலமாக பிற இயக்குனர்களின் கைவண்ணத்தில் பல திரைப்படங்களை அளித்துள்ளார்.

ஐ.நா. நிபுணர்கள் குழு, முட்டாள்கள் : இலங்கை அமைச்சர்.


இலங்கைப் போர்க்குற்றம் தொடர்பாக விசாரணை நடத்தி அறிக்கை சமர்பித்துள்ள ஐ.நா. குழு 3 முட்டாள்களின் குழு என்று இலங்கை அமைச்சர் விமல் வீரவன்சே தெரிவித்ததாக அந்நாட்டின் தமிழ் இணையதளங்களில் செய்தி வெளியாகி ள்ளது.

இது குறித்து வெளியான செய்தியில் கூறியிருப்பதாவது,

3 முட்டாள்கள் கொண்ட ஐநாவின் நிபுணர் குழு இலங்கையில் மேற்கத்திய நாடுகளின் கைப்பாவையாக இருக்கும் அரசை நிறுவுவதற்கான சதித் திட்டங்களுக்கு துணைபோயுள்ளது என்று விமல் குற்றம்சாட்டியுள்ளார்.

பத்தரமுல்லையில் அமைந்துள்ள தேசிய சுதந்திர முன்னணி கட்சித் தலைமையகத்தில் நடைபெற்ற ஊடகவியலாளர் மாநாட்டில் கலந்து கொண்ட போது அவர் இவ்வாறு கருத்து தெரிவித்துள்ளார்.

ஐக்கிய நாடுகள் செயலாளர் நாயகத்தினால் நியமிக்கப்பட்ட ஆலோசனை பெறுவதற்கான குழுவொன்று தாம் தயாரித்த அறிக்கையை செயலாளர் நாயகம் படித்துப்பார்க்க முன்பதாகவே வெளியிட்ட சம்பவம் வரலாற்றில் இதுதான் முதல் தடவை என அவர் குறிப்பிட்டார்.

அஜித்குமார் நற்பணி இயக்கத்தை கலைக்கிறேன் : அஜீத் அதிரடி அறிவிப்பு.


நடிகர் விஜய் அரசியல் பக்கம் வந்துவிட்டதால் அஜீத்தையும் அரசியல் பக்கம் இழுத்தனர் அவரது ரசிகர்கள். அவர் வேண்டாம் என்று மறுத்து வந்தார்.

இதனால் ரசிகர்கள் அவர்களாகவே கொடி, கட்சி என்று கூட்டம் போட்டு வந்தனர். இதை அஜீத் வன்மையாக கண்டித்தார். தொடர்ந்து இது போன்ற நடவடிக்கைகளில் ஈடுபட்டுவந்தால் எனது தலைமையில் இயங்கும் மன்றத்தை கலைத்துவிடுவேன் என்று எச்சரித்தார்.

இந்நிலையில் தனது பிறந்த நாளை முன்னிட்டு அவர் வெளியிட்டிருக்கும் அறிக்கையில், மன்றத்தை கலைத்துவிட்டதாக அறிவித்துள்ளார்.

இது குறித்து அவர் வெளியிட்டிருக்கும் அறிக்கையில், அமராவதி திரைப்படம் மூலம் தொடங்கிய எனது திரைப்பட பயணத்தில் மங்காத்தா 50வது திரைப்படமாக வெளிவர உள்ளது.

எனது இந்த திரைப் பயணத்தில் எனக்கு உறுதுணையாக இருந்த என் சக நடிகர், நடிகையர், தயாரிப்பாளர்கள், இயக்குனர்கள், தொழில்நுட்ப கலைஞர்கள், ஊடக நண்பர்கள், ரசிகர்கள், பொதுமக்கள் மற்றும் எனக்கு ஊக்கமும், ஆக்கமும் கொடுத்த என் குடும்பத்தார்க்கும் இந்த அறிக்கை மூலம் என் நன்றியை தெரிவித்துக் கொள்கிறேன்.

நீண்ட நாட்களாகவே என்னை சிந்திக்க வைத்த ஒரு கருத்தை சொல்ல இன்றே உகந்த நேரம் என கருதி இந்த அறிக்கையை வெளியிடுகிறேன்.

நான் என்றுமே ரசிகர்களை எனது சுயநலத்திற்காக பயன்படுத்தியதில்லை. எனது தனிப்பட்ட விருப்பு, வெறுப்புக்காக அவர்களை கேடயமாக பயன்படுத்திக் கொண்டதும் இல்லை, பயன்படுத்தவும் மாட்டேன்.

நான் நடித்த படங்கள் நன்றாக இருந்தால் அதற்கு ஆதரவு தரவும் - சரியாக இல்லாவிட்டால் விமர்சிக்கவும் ரசிகர்களுக்கு உரிமை உண்டு.

எனது திரைப்படத்தை ரசிக்கும் ரசிகர்கள் எல்லோருமே என் இயக்க உறுப்பினர்கள் இல்லை என்பதை நான் அறிவேன். என் ரசிகர்களிடையே இக்காரணத்தை கொண்டு நான் வித்தியாசம் பார்ப்பதில்லை - பார்க்கவும் மாட்‌டேன்.

கோஷ்டி பூசல், ஒற்றுமையின்மை, தலைமையின் கட்டுப்பாட்டுக்கு இணங்காமல் தன்னிச்சையாக செயல்படுவது, தங்களது தனிப்பட்ட அரசியல் கருத்துக்காக நற்பணி இயக்கத்தை பயன்படுத்துவது என்ற பல்வேறு காரணங்கள் என்னுடைய எண்ண ஓட்டத்திற்கு உகந்ததாக இல்லை.

சமுதாய நல பணிகளில் ஈடுபடுவது கூட யாருக்கும் இடையூறு இல்லாமல், குறிப்பாக தங்களது குடும்பத்திற்கு சுமையாக இல்லாமல் செய்ய வேண்டும் என்பதையே நான் வலியுறுத்தி வருகிறேன். நல திட்டங்கள் செய்வதற்கு இயக்கம் என்ற அமைப்பு வேண்டாம்; நல் உள்ளமும், எண்ணமும்‌ போதும் என்பதே என் கருத்து.

வருகிற மே 1ம் தேதி என்னுடைய நாற்பதாவது பிறந்த நாளில் எனது கருத்தை எனது முடிவாக அறிவிக்கிறேன். இன்று முதல் எனது த‌லைமையின் ‌கீழ் கட்டுப்பட்டு வந்த அஜித்குமார் நற்பணி இயக்கத்தை கலைக்கிறேன்.

மாறிவரும் காலகட்டத்தில் ‌பொதுமக்கள், எல்லோரையும் உன்னிப்பாக கவனிக்கிறார்கள் என்பதை கருத்தில் கொண்டு திரைப்படத்திற்கு அப்பாற்பட்டு ‌பொதுமக்களின் கண்ணோட்டத்தில் கண்ணியமாக தென்பட்டால் மட்டுமே ஒரு நடிகனுக்கும், அவருடைய ரசிகர்களுக்கும் ஒரு கவுரவம் கிட்டும் என்பதே என் நம்பிக்கை.

அந்த கவுரவமும் எனது இந்த முடிவிற்கு ஆதரவு அளிக்கும். எனது உண்மையான ரசிகர்களின் கருத்து மட்டுமே எனது பிறந்த நாள் பரிசாகும் என்று கூறியிருக்கிறார்.

ரஜினிகாந்த் நலமாக இருக்கிறார் : கலைஞர் ,லதா ரஜினிகாந்த் பேட்டி.

மருத்துவமனையில் ரஜினியை சந்தித்தார் கலைஞர்

நடிகர் ரஜினிகாந்த் நடிக்கும் ராணா படத்தின் படப்பிடிப்பு இன்று சென்னை ஏவி.எம். ஸ்டூடியோவில் நடைபெற்றது.

படப்பிடிப்பின் போது அவருக்கு வயிறு கோளாறு மற்றும் மூச்சுத்திணறல் ஏற்பட்டதால் அவரை உடனடியாக மயிலாப்பூர் இசபெல்லா மருத்துவமனையில் தீவிர சிகிச்சை பிரிவில் சேர்த்தனர்.

சிகிச்சை பெற்று வரும் ரஜினிகாந்தை முதல்வர் கருணாநிதி நேரில் சந்தித்து உடல் நலம் குறித்து விசாரித்தார்.

மருத்துவர்களிடம் ரஜினியின் உடல்நிலை குறித்து கலைஞர் விசாரித்தபோது, தொடர்ந்து சிகிச்சை அளிக்கப்படுகிறது. நாளை அல்லது நாளை மறுதினம் அவர் வீடு திரும்புவார் என்று தெரிவித்தனர்.

ரஜினிகாந்த் நலமாக இருக்கிறார் : கலைஞர் ,லதா ரஜினிகாந்த் பேட்டி.

நடிகர் ரஜினிகாந்த் மூன்று வேடங்களில் நடிக்கும் ராணா படத்தின் படப்பிடிப்பு இன்று சென்னை ஏவி. எம். ஸ்டூடியோவில் நடைபெற்றது.

நாயகி தீபிகா படுகோனேவுடன் பாடல் காட்சி படப்பிடிப்பின் போது ரஜினிக்கு வயிறு கோளாறு மற்றும் மூச்சுத்திணறல் ஏற்பட்டதால் அவரை உடனடியாக மயிலாப்பூர் இசபெல்லா மருத்துவமனையில் தீவிர சிகிச்சை பிரிவில் சேர்த்தனர்.

ரஜினியில் உடல்நிலை குறித்து லதா ரஜினிகாந்த் செய்தியாளர்களுக்கு பேட்டி அளித்தார்.

இதையடுத்து சிகிச்சை பெற்று வரும் ரஜினிகாந்தை முதல்வர் கருணாநிதி மற்றும் அவரது மகள் கனிமொழி ஆகியோர் நேரில் சந்தித்து உடல் நலம் குறித்து விசாரித்தனர்.

பின்னர் வெளியே வந்த முதல்வர் கருணாநிதி செய்தியாளர்களிடம், சிகிச்சைக்கு பிறகு ரஜினிகாந்த் நலமாக இருக்கிறார் என்று தெரிவித்தார்.