சசிகலா நீக்கம் : மொட்டை அடித்து அதிமுகவினர் மகிழ்ச்சி !

தமிழக முதல்வர் ஜெயலலிதாவின் தோழியான சசிகலா மற்றும் அவர்கள் குடும்பத்தினர், நேற்று அ.தி.மு.க.,வில் இருந்து நீக்கப்பட்டனர். இச்செய்தி வெளியாகியதும், திருப்பூர் எம்.ஜி.ஆர்., சிலை அருகே கூடிய அ.தி.மு.க.,வினர் சிலர், பட்டாசு வெடித்து கொண்டாடினர். நிர்வாகிகள் ஒன்பது பேர் மொட்டை அடித்து பட்டாசு வெடித்தனர்; கட்சித் தொண்டர்கள் பலர் வாழ்த்து தெரிவித்தனர்.

மொட்டை அடித்திருந்தவர்கள் கூறுகையில், "எம்.ஜி.ஆர்.,காலத்தில் உண்மையான விசுவாசிகளுக்கு கட்சியில் மதிப்பு இருந்தது. முதல்வர் ஜெ., பொது செயலாளரானதும், சசிகலாவின் குடும்பம் அவரை சூழ்ந்து கொண்டது. யாருமே பொது செயலாளரை சந்தித்து பேச முடியாத, புகார் தெரிவிக்க முடியாத நிலை ஏற்பட்டது. ஒவ்வொரு மாவட்டத்துக்கும் பிரதிநிதிகளை வைத்து, சசிகலா குடும்பம், கட்சியை கார்ப்பரேட் கம்பெனி போல் நடத்தி வந்தது.

சசிகலா மற்றும் அவர் குடும்பத்தினரை கட்சியில் இருந்து நீக்கியுள்ளார். இதன் மூலமாக, கட்சியையும், முதல்வரையும் பிடித்திருந்த குடும்ப சனி விலகி விட்டது' என்றனர்.

கொலை வழக்கில் பணம் கைமாரியதால் காங். பிரமுகரை கைது செய்யயாமல் விட்ட சேலம் போலீஸ்.

சேலம் நகரில் உள்ள நெத்திமேடு பகுதியை சேர்ந்தவர் வெங்கட்டராமன். இவர் மத்திய அமைச்சர் ப.சிதம்பரத்தின் தீவிர ஆதரவாளர். தனது விசுவாசியான இவருக்கு பல்லவன் கிராம வங்கியின் இயக்குனாராகவும் ப.சிதம்பரம் பதவி வழங்கியிருந்தார்.

சேலத்தில் வளர்ந்து வரும் இந்த காங்கிரஸ் பிரமுகருக்கு கொடிகட்டுவது, தோரணம் கட்டுவது, வாழ்க கோசம் போடுவதற்காக சில எடுபுடிகள் எப்போதும் கூடவே வைத்திருப்பார்.

அப்படி இருந்த எடுபுடிகளில் ஒருவர் கரியபெருமால் கோவில் கரடு பகுதியை சேர்ந்த ஈஸ்வரமூர்த்தி என்கிற கார்த்திக். இந்த எடுபுடியை கடந்த 11ம் தேதி இரவு கொண்டலாம்பட்டி காவல் நிலைய எல்லையில் உள்ள எட்டி மாணிக்கம்பட்டி என்ற இடத்தில் உள்ள பொன்னுசாமி என்பவருக்கு சொந்தமான ஒரு சோளக்காட்டில் வைத்து யாரோ கொலை செய்துவிட்டனர்.

கொலை செய்யப்பட்டவரிடம் கிடந்த செல்போனை வைத்து விசாரணை செய்ததில், அன்னதானப்பட்டி பகுதியை சேர்ந்த பெருமாள் மகன் வருன்கிருஷ்ணன் என்கிற விஜய் என்பவர் கொலையான அன்று பல தடவை கார்த்தியுடன் செல்போனில் பேசியிருப்பது தெரியவந்துள்ளது.

இந்த விஜய்யும், வெங்கட்டராமனின் இன்னொரு எடுபுடிதான், விஜயை பிடித்து விசாரணை செய்ததில், தானும், தன்னுடைய இன்னொரு நன்பரான கிச்சிப்பாளையம் குமார் என்கிற சிவக்குமாரும் சேர்ந்து தான் கார்த்தியை கொலை செய்ததாக தெரிவித்துள்ளார்.

கொலைக்கான காரணம் பற்றி போலீசார் விசாரணை செய்தபோது, எனக்கும் அவனுக்கும், வரவு செலவு பிரச்சனை.... என்று முதலில் சொல்லியுள்ளான், ஆனால் சிவக்குமாரின் வாக்குமூலம் வேறு மாதிரி இருந்துள்ளது.

இதற்கிடையில் கொலையானவன், கொலை செய்தவன் இருவருமே அந்த காங்கிரஸ் பிரமுகரின் ஆட்களாக இருந்தும் இரண்டு பக்கமுமே அந்த பிரமுகர் தலை காட்டவில்லை.

கொலைக்கு வேறு பலமான காரணம் இருக்கும் என்று சந்தேகம் கொண்ட போலீசார், கொஞ்சம் கடுமையாக விசாரிக்க, என்கிட்ட ஒருத்தன் பணம் வாங்கிக்கிட்டு ரொம்பநாளா திருப்பி குடுக்காம இழுத்து அடிக்கிறான், அவன்கிட்ட பணம் வாங்கிக்குடுன்னு நான் தான் கார்த்திகிட்ட சொன்னேன், அதுக்காக நாங்க மூன்று பேரும் போனப்பத்தான் அந்த சோளக்காட்டுல ஒண்ணா தண்ணியடிச்சோம். அப்ப எங்க அண்ணன் வெங்கட்டராமன் பொண்டாட்டி ராஜேஸ்வரிக்கும் அவருக்கு தெரிஞ்ச ஒரு பஸ் உரிமையாளர் மணிவாசகம் என்பவருக்கும் கள்ளக்காதல் இருக்குதுன்னு கார்த்தி என்கிட்ட சொன்னான்...., இவன் சொன்னத என்னால தங்கிக்க முடியல... எங்களுக்கு எல்லாம் தாயாக இருந்து சோறு போட்ட அண்ணியைபற்றி இவன் தப்ப பேசினது என்னால தாங்கமுடியலே... அதனாலதான், நான் அவனை கொலை செய்தேன் என்று சொல்லியுள்ளான்.

சரி, நீ யாருகிட்ட பணம் கொடுத்தே...? என்று போலீசார் போட்ட முதல் கொக்கிக்கு பதில் சொல்ல முடியவில்லை விஜய்யால். சரி.... நீயும் கார்த்தியும் பணம் வசூல் செய்ய போனவர்கள் எதுக்கு கத்தியெல்லாம் எடுத்து போனீங்க....? என்று போலீசார் கேட்டுள்ளனர்.

அதற்கும் விஜய்யால் பதில் சொல்ல முடியவில்லை. “அண்ணிக்கும், பஸ் ஒன்றுக்கும் கள்ளத்தொடர்பு என்ற போதே இதுக்கும் “அண்ணனுக்கும் தொடர்பு வந்துவிட்டது என்பதை புரிந்து கொண்ட போலீசார் விசாரணையை தீவிரப்படுத்திய போது, முழு விசயத்தையும் சொல்லிவிட்டான் விஜய்.

அவனது வாக்குமூலம் எப்படியிருந்தது என்பதை நம்மிடம் சொன்ன போலீசார், அவ்வப்போது எங்களுக்கு எடுபுடி வேலைகள் கொடுக்கும் வெங்கட்டராமனின் வீட்டில் நாங்கள் இரண்டு பேரும் ஒன்றாகத்தான் இருப்போம்.

பல்லவன் கிராம வங்கியின் இயக்குனர் பதவியில் இருந்துகொண்டு சமீபகாலமாக அதிக வருமானம் பார்த்துவரும் வெங்கட்டராமனனின் மனைவி ராஜேஸ்வரிக்கும், மணிவாசகம் என்ற ஒரு பஸ் உரிமையாளர் ஒருவருக்கும் “கள்ளக்காதல் இருந்தது. இதை பலதடவை நாங்க பாத்திருக்கிறோம்.

வெங்கட்டராமன் மீது மிகுந்த அன்பு கொண்டிருந்த கார்த்தி அண்ணன் “மனைவியும் “மணிவாசகாவும் ஒன்றாக இருக்கும் காட்சியை பார்த்து விட்டேன் என்றும், “அண்ணா நீங்க கொஞ்சம் இந்த விஷயத்தை கவனமாபாருங்க இல்லையின்னா உங்க “மானம் போயிரும் என்று வெங்கட்டராமனிடம் சொல்லியிருக்கிறான்.

அப்படியா நடக்குது...? என்று ஆச்சரியப்பட்ட வெங்கட்டராமன் “சரி இதை எங்கயும் வெளியில சொல்லாதே... என்று கொஞ்சம் “கரன்சியை கார்த்தியின் கையில் கொடுத்துவிட்டு போகிறார்.

ஒகோ... “இதுக்கெல்லாம் பணம் கொடுப்பாங்க போல என்று ருசி கண்ட கார்த்தி, கொஞ்ச நாளுக்கு பின்னர் தனக்கு இன்னும் கொஞ்சம் பணம் வேண்டும் என்று காங்கிரஸ் பிரமுகரிடம் போய் கேட்டுள்ளான். பலதடவை அப்படி கொடுத்துள்ளார்.

கார்த்தி மீண்டும்... மீண்டும்.... பணம் கேட்டு தொல்லை கொடுக்க.... “நீ கேட்டப்பவேல்லாம் நான் பணம் குடுக்க முடியாது... நீ வேண்ணா எம்பொண்டாட்டிக்கும் அவனுக்கும் தொடர்பு இருக்குதுன்னு ஊருக்குள்ள போய் சொல்லு...., யாரும் நம்பமாட்டங்க.... என்று சொல்லிவிட்டார் வெங்கட்டராமன்.

அப்ப நான், என் வேலைய பார்த்துக்கிறேன், அந்த போட்டோவை ஒரு பிரின்டு போட்டு ஊர்பூராவும் நான் போஸ்டர் அடிச்சி ஓட்டப்போறேன்.... என்று சொல்லிவிட்டு கிளம்பியுள்ளான் கார்த்தி.

“போஸ்டர் அடிச்சு ஒட்டப்போறேன் என்று சொன்னதும் பதறிப்போன வெங்கட்டராமன் “டேய் என்னடா சொல்லறே...? என்று கொஞ்சம் இறங்கி வந்து கேட்டுள்ளார், ஆமானா “நீ சும்மா காசு குடுப்பியாண்ணா...? அதனால தான் நான் எல்லாத்தையும் “வீடியோ போட்டோவெல்லாம் எடுத்து வச்சிருக்கிறேன் என்று சொல்லியுள்ளான் கார்த்தி.

இப்போதைக்கு இதை வச்சுக்கோ.... என்று கொஞ்சம் பணத்தை கார்த்தியிடம் கொடுத்துவிட்டு, இதற்கு ஒருவழியில் முடிவுகட்ட விரும்பிய வெங்கட்டராமன், தனது இன்னொரு எடுபுடியான விஜயிடம் சொல்லி கார்த்திக்கு “முடிவு கட்டச்சொல்லியுள்ளார்.

அதன்படி, விஜய் தன்னுடைய நண்பரான கிச்சிப்பாளையம் சிவக்குமார் என்பவரை கூட சேர்த்துக்கொண்டு கார்த்தியை கூப்பிட்டு எனக்கு ஒருவன் பணம் கொடுக்க வேண்டும், அதை என்னால் வாங்கமுடியவில்லை.... நீ வந்தால் தான் அவன் எனக்கு கொடுப்பான் என்று சொல்லி ஒருவாரமாக மூவரும் தினமும் ஒன்றாக சேர்ந்து தண்ணியடித்துள்ளனர்.

கார்த்தி, விஜயை முழுமையாக நம்ம்பிய பின்னர், அவனை கூட்டிப்போய் சோளக்காட்டில் வைத்து கொலை செய்துள்ளனர். அப்போது கார்த்தியை, வெங்கட்டராமனின் மனைவி ராஜேஸ்வரிக்கும் பஸ் ஓனருக்கும் கள்ளத்தொடர்பு இருப்பதாக சொன்னதையும், அதை சொல்லச்சொல்லி சிவக்குமார் மிரட்டுவதையும் கார்த்தியை குத்தி கொலை செய்தபோது சோளக்காட்டுக்குள் நடந்ததையெல்லாம் விஜய் தனது செல்போனில் விடியோவாக பதிவு செய்து வைத்துள்ளான்.

அதுவுமில்லாமல், கொலை செய்தபின்னர் போன் செய்து வெங்கட்டராமனிடம் பேசியது போன்ற எல்லாவற்றையும் பதிவு செய்து வைத்துக்கொண்டு, இந்த ஆதாரத்தை வைத்து பின்னர் வெங்கட்டராமனிடம் மிரட்டி பணம் வாங்க இவன் திட்டமிட்டுள்ளான்.

அந்த செல்போனில் பதிவு செய்யப்படிருப்பதையும் கைப்பற்றிய கொண்டலாம்பட்டி போலீசார் வெங்கட்டராமனை கைது செய்ய முடிவு செய்திருந்த நேரத்தில், இந்த தகவல், மல்லூர் காவல் நிலையத்தில் புரோக்கராக இருக்கும் தபால்காரர் தனபால் என்பவருக்கு தெரிந்துள்ளது. சேலம் மாவட்ட போலிஸ் டிபார்ட்மென்டில் மிகப்பெரிய செல்வாக்கு உள்ளவர் இந்த தபால்காரர்.

சேலம் மாவட்டத்தில் உள்ள பல உயர் அதிகரிகளுக்கு இந்த தனபால்தான் இடமாறுதல் உத்தரவு வாகிக்கொடுப்பவர், இந்த அளவுக்கு செல்வாக்கு பெற்றுள்ளா தனபால் நான் காங்கிரஸ் கட்சியை சேர்ந்தவன் என்று சொல்லிக்கொள்வார்.

காங்கிரஸ் கட்சியில் நல்ல செல்வாக்கில் இருக்கும் வேங்கட்டராமனை போலீசார் தூக்கப்போவது தெரிந்தது, நேராக வெங்கட்டராமனிடம் போய் டீல் பேசி.... இந்த விசயத்தை “கமுக்கமாக” முடிக்க 40 லட்சத்தை வாங்கிக்கொண்டு வந்து “பரமசிவனின்” பெயரை கொண்ட சேலம் மாவட்ட கூடுதல் கண்காணிப்பாளருக்கும், “தாய்மொழி”யின் செல்வனான ரூரல் துணை கண்காணிப்பாளருக்கும் இருபத்தி ஐந்து லட்சங்களை வாரி இரைத்து விட்டு மீதியை அமுக்கிக்கொண்டார் தனபால்.

உண்மையான கொலையாளிகளை கண்டுபிடித்து கொடுத்த கொண்டலாம்பட்டி காவல் நிலையத்தில் வேலை பார்க்கும் போலீசார், மற்றும் சில அதிகாரிகள் இப்போது அந்த காங்கிரஸ் பிரமுகர் மீது வழக்கு கூட போடமுடியாமல் உள்ளனர்.

தங்களிடம் இருக்கும் ஆதாரங்களை எல்லாம் சில நல்ல உள்ளம கொண்ட உயர் அதிகாரிகளுக்கும் கொடுத்துள்ளார்கள். இந்த விபரங்கள் எல்லாம் பத்திரிக்கையாளர் களுக்கும் தெரிந்துவிட்டதால் இப்போது வெங்கட்டராமன் மீது என்ன வழக்கு போடலாம் என்று ஆலோசனை நடத்திவருகிறார்கள் சேலம் மாவட்ட போலிஸ் அதிகாரிகள்.

நன்றி - நக்கீரன்

அமைச்சரவையில் இருக்கும் சசிகலா கும்பலின் பட்டியல். இவர்கள் வெளியேற்றப்படுவர்களா?

சசிகலா உள்பட 14 பேர் அதிமுகவில் இருந்து வெளியேற்றப்பட்டதையடுத்து, இன்னும் தமிழக அமைச்சரவையில் சசிகலாவின் ஆதரவாளர்கள் 15பேர் அமைச்சர்களாக உள்ளனர். இவர்கள் அனைவரும் சசிகலாவின் கோஷ்டி என்பதால் இவர்களின் நிலை என்னவாகும் என்பது கேள்வியாக உள்ளது. பெரும் மாற்றம் ஏற்படும் என்றும் கூறப்படுகிறது.

அமைச்சரவையில் இருக்கும் சசிகலா கும்பலின் பட்டியல்.

செந்தில் பாலாஜி,

பச்சைமால்,

நத்தம் விஸ்வநாதன்,

டாக்டர் விஜய்,

வைத்தியலிங்கம்,

கோகுல இந்திரா,

பழனியப்பன்,

வளர்மதி,

ஆனந்தன்,

ஜெயபால்,

செந்தூர்பாண்டியன்,

எடப்பாடி பழனிச்சாமி,

காமராஜ்,

அக்ரி கிருஷ்ணமூர்த்தி

செல்வராஜ்

ஆகியோர் உட்பட ஏராளமான அமைச்சர்களின், இலாகாகளில் மாற்றம் ஏற்படும் என செய்திகள் வெளியாகி உள்ளன.

சசிகலா வெளியேற்றப்பட்டதில் சோவின் பங்கு.

சசிகலா வெளியேற்றப்பட வேண்டும் என்பதற்கு கடந்த சில வாரங்களாகவே ஜெயலலிதாவுக்கு ஆயிரம் காரணங்கள் இருந்தன. அவையெல்லாம் அதிகாரம் மற்றும் சதி தொடர்பான காரணங்கள். அரசியல் ரீதியான காரணங்கள் அல்ல. ஆனால், அரசியல் ரீதியாக சசிகலாவை அப்புறப்படுத்த வேண்டிய அவசியம் ஒன்று கடந்த வார இறுதியில்தான் அவருக்கு தெளிவாக எடுத்துச் சொல்லப்பட்டது.

“தேசிய அரசியலில் நீங்கள் இறங்கும் யோசனை இருந்தால், சசிகலாவை இப்போதாவது கழட்டி விடுவதைத் தவிர வேறு வழி கிடையாது” என்ற ரீதியில் இருந்தது அந்த அட்வைஸ்.

கடந்த வார இறுதியில் போயஸ் கார்டனில் நடைபெற்ற ஒரு சந்திப்புதான் சசிகலா வெளியேற்றப்பட வேண்டும் என்பதற்கான அரசியல் பக்கத்தை முதல்வர் ஜெயலலிதாவுக்கு தெளிவாகக் காட்டியது. முதல்வர் ஜெயலலிதாவைச் சந்தித்தவர் பத்திரிகையாளரும், சில அரசியல் விஷயங்களில் ஜெயலலிதாவின் ஆலோசகருமான சோ.

அதன் பின்னரே சசிகலாவை வெளியேற்றும் இறுதி முடிவை அரசியல் ரீதியாக எடுப்பதற்கு ஜெயலலிதா தயாரானார்.

சோ இந்தச் சந்திப்புக்கு செல்வதற்குமுன், சில பின்னணி சம்பவங்கள் நடைபெற்றிருந்தன.

சென்னையில் தலைமுறைகளாக வர்த்தகத்தில் ஈடுபட்டுள்ள, தேசிய அளவில் அறியப்பட்ட ஒரு நிறுவனத்திடமே சசிகலா தரப்பு இரண்டு மாதங்களுக்குமுன் ஒரு டீல் பேச முயன்றது. அவர்களது பரம்பரை வர்த்தகத்தை இனியும் தமிழகத்தில் தொடர்வது என்றால், அவர்களது நிறுவனத்தின் ஆபரேஷனல் சப்சிடரியாக இயங்கும் மற்றொரு நிறுவனத்தை தமக்கு தாரை வார்த்துக் கொடுக்க வேண்டும் என்பதே டீலின் சாராம்சம்.

பெரிய நிறுவனம் இந்த மிரட்டலுக்கெல்லாம் பணியத் தயாராக இல்லை. ஆனால், குறிப்பிட்ட பெரிய நிறுவனத்தின் இளைய தலைமுறை தலைமையால் இந்த அழுத்தத்தை சரியாக டீல் பண்ணவும் முடியவில்லை. நிறுவனத்தின் இளைய தலைமுறை, அவர்களின் லீகல் விவகாரங்களைக் கவனிக்கும் மற்றொரு பாரம்பரியம் மிக்க சட்ட நிறுவனத்திடம் இது தொடர்பாக ஆலோசனை கேட்டார்.

அந்த சட்ட நிறுவனம் சென்னையில் உள்ள வேறு பெரிய நிறுவனங்களுக்கும் -இந்திய சினிமா இசை வர்த்தகத்தில் கால்பதித்துள்ள வெளிநாட்டு நிறுவனம் உட்பட- லீகல் கன்சல்டேஷன் செய்யும் குரூப். அவர்களிடம் ஏற்கனவே இதே போன்ற மிரட்டல் தொடர்பாக வேறு நிறுவனங்களிடமிருந்தும் ஆலோசனைகள் கோரப்பட்டிருந்தன. எல்லாமே இம்முறை அ.தி.மு.க. அரசு அமைந்தபின் வந்த மிரட்டல்கள்தான்!

இந்த விபரங்கள், கடைசியாக ஆலோசனைக்கு வந்த நிறுவனத்திடம் சொல்லப்பட, ஏற்கனவே பாதிக்கப்பட்ட மற்றைய நிறுவனங்களின் தலைமைகளுடன் இது தொடர்பாக கலந்து பேசுவதற்கு முடிவு செய்யப்பட்டது. சட்ட நிறுவனத்தில் இருந்தே மற்றைய நிறுவனங்களுக்கு போன் செய்யப்பட்டு இது தொடர்பாக பேசப்பட்டது.

நவம்பர் மாத இறுதியில், சென்னையின் முக்கிய தொழிலதிபர்கள் சிலர் சந்தித்தனர். இந்தச் சந்திப்பு சென்னையில் அமைந்துள்ள கிளப் ஒன்றில் நடைபெற்றது. இரண்டாவது சந்திப்பு பெங்களூருவில் நடைபெற்றது. இந்த விஷயத்தை தமிழக முதல்வரிடம் கொண்டுசெல்ல லாபி குரூப் ஒன்று உருவாகியது.

இதுவரைக்கும் சரி. ஆனால், பூனைக்கு யார் மணி கட்டுவது? இதில் சிக்கல் ஏற்படுத்தும் பார்ட்டி, சசிகலா குரூப் என்பதால், தற்போது சென்னையில் பெரியளவில் வர்த்தகம் நடந்து கொண்டுள்ள தொழிலதிபர்கள் தயங்கினார்கள். விஷயம் சசிகலா காதுக்கு போனால், தமது நிறுவனங்களுக்கு தேவையில்லாத சிக்கல் வந்துகேரும் என்ற பயம் அவர்களுக்கு.

இந்தளவுக்கு டெவலப்மென்ட் நடந்த பின்னர், நாம் முதலில் குறிப்பிட்ட சட்ட நிறுவனம் கொடுத்த அட்வைஸ்தான், சோவை தொடர்பு கொள்ளலாமே என்பது. விஷயம் சரியானதாக இருந்தால், அதை தைரியமாக ஜெயலலிதா வரை கொண்டுசெல்ல சரியான நபர் அவர்தான் என முடிவாகியது. தொழிலதிபர்களில் லாபி குரூப் சோவுடன் பேசியது. தம்மிடமிருந்த ஆதாரங்கள் அனைத்தையும் காட்டினார்கள்.

அதன்பின் சோ, ஜெயலலிதாவை தொடர்புகொண்டு சந்திப்புக்கு நேரம் கேட்டார். கடந்த வார இறுதியில் சந்திப்பு நடந்தது.

இதற்கிடையே சமீபத்தில் தமிழகம் வந்திருந்த பா.ஜ.க. தலைவர் ஒருவரும் ஜெயலலிதா தொடர்பாக சில விஷயங்களை சோவுடன் விவாதித்திருந்தார். ஜெயலலிதா தேசிய அரசியலுக்குள் வருவது தொடர்பாகவும், பா.ஜ.க.-அ.தி.மு.க. கூட்டு தொடர்பாகவும் அப்போது பேசப்பட்டது. அந்த விஷயங்களை ஜெயலலிதாவரை கொண்டு செல்லும் பொறுப்பும் சோவிடம் பா.ஜ.க. தலைவரால் கொடுக்கப்பட்டிருந்தது.

கடந்த வார இறுதியில் ஜெயலலிதாவைச் சந்தித்த சோ, அவரைச் சுற்றி நடக்கும் சசிகலா குரூப் விவகாரங்களை ஜெயலலிதாவுக்கு விளக்கமாகக் கூறியபோது, ஜெயலலிதாவுக்கு ஆச்சரியம் கலந்த கோபம் ஏற்பட்டது. ஆச்சரியத்துக்கு காரணம், இவை எதுவுமே அவருக்கு தெரிந்திருக்கவில்லை.

“எம்.ஜி.ஆர். காலத்துக்குப்பின் இம்முறை உங்களை அமோகமாக வெற்றிபெற வைத்திருக்கிறார்கள் தமிழக மக்கள். இதை நீங்கள் சரியாகப் பயன்படுத்திக் கொள்ள விரும்பவில்லையா? இன்னமும் ஒன்றரை வருடங்களில் வரப்போகும் நாடாளுமன்ற தேர்தலிலும் இப்படியொரு வெற்றி கிடைத்தால், தேசிய அரசியலில் நீங்கள் எங்கே போக முடியும் என்பது உங்களுக்கு தெரியாதா? அவற்றையெல்லாம், உங்களைச் சுற்றி இருப்பவர்களால் கெடுத்துக் கொள்ளப் போகிறீர்களா?” என்று இறுதியில் சோ கேட்டாராம்.

“நான் கடுமையான முடிவு ஒன்றை எடுக்க வேண்டும் என்கிறீர்கள் அப்படித்தானே” என்று ஜெயலலிதா இறுகிய முகத்துடன் கேட்டாராம்.

அதற்கு சமஸ்கிருத ஸ்லோகம் ஒன்றை சோ கூறியபோது, ஜெயலலிதா மரியாதை நிமித்தம் அவரை வணங்கி, “வெளியேற்ற வேண்டியவர்கள் இன்னமும் ஒரு வாரத்துக்குள் வெளியேற்றப்படுவார்கள்” என்றாராம்.

நன்றி - விறுவிறுப்பு.காம்.

சனி பெயர்ச்சி சசி பெயர்ச்சியாகிவிட்டது : எஸ்.வி.சேகர் .

அதிமுகவில் அடிப்படை உறுப்பினர் பதவி முதல் அனைத்து பொறுப்புகளில் இருந்தும் சசிகலா நீக்கப்பட்டுள்ளார். இதுகுறித்து நடிகரும், மயிலாப்பூர் சட்டமன்ற தொகுதியின் முன்னாள் அதிமுக உறுப்பினருமான எஸ்.வி.சேகரிடம், தனியார் தொலைக்காட்சி ஒன்று கருத்து கேட்டது.


இதற்கு பதில் அளித்துப் பேசிய அவர், ஜெயலலிதா அவர்கள் உற்ற தோழி, நெருங்கிய தோழி என்ற பதவியை எடுக்கவில்லை. உற்ற தோழியாக இருக்கலாம். நெருங்கிய தோழியாக இருக்கலாம். அவர்கள் அறிவித்திருப்பது என்னவென்றால், அதிமுகவில் இருக்கக் கூடிய பதவியை பறித்திருக்கிறார்கள். இல்லத்தில் இருந்து வெளியேறியிருக்கிறார்கள். வெளியேற்றப்படவில்லை. இல்லத்தில் இருந்து மூன்று நாட்களுக்கு முன்பே வெளியே போய்விட்டதாக சொல்லுகிறார்கள். அதைப்பற்றி பேசத்தேவையில்லை. நம்மைப் பொறுத்தவரை அதிமுகவில் இருந்து ஒரு பவர் செக்டராக இருந்தவர்கள் வெளியேற்றப்பட்டிருக்கிறார்கள்.

இது என்றைக்கோ நடக்கும் என்று பலபேர் எதிர்பார்த்தார்கள். பலபேர் சாபமிட்டார்கள். பலபேர் இதுநடக்காதா என ஏங்கினார்கள். அது இன்று நடந்திருக்கிறது. நாளைக்கு சனி பெயர்ச்சி. அது சசி பெயர்ச்சியாகிவிட்டது என்றார்.

சசிகலா நீக்கப்பட்டதிற்காக, பட்டாசு வெடித்துக் கொண்டாடுபவர்கள் யார்?

சசிகலா மற்றும் குடும்பத்தினர் கூண்டோடு அதிரடியாக நீக்கப்பட்டது, அ.தி.மு.க.-வில் பெரிய உற்சாக அலையையே ஏற்படுத்தியிருக்கிறது. கடந்த சட்டசபைத் தேர்தலில் வெற்றி பெற்றவுடன் அ.தி.மு.க.-வினரில் மனநிலை எப்படி இருந்ததோ, கிட்டத்தட்ட அதே மனநிலையுடன் வீதிகளில் அ.தி.மு.க.-வினரைக் காணக்கூடியதாக உள்ளது.

அநேக நகரங்களில் நிலைமை அப்படித்தான் உள்ளது. போயஸ் கார்டனுக்கு வெளியேயும் ஆனந்தத்துடன் கோஷம் எழுப்பும் தொண்டர்களை இன்று மாலைவரை காணக்கூடியதாக இருந்தது.

மொட்டை போடும் தொண்டர்கள், பட்டாசு கொளுத்தும் ஆட்கள், ஸ்வீட் கொடுக்கும் ரத்தத்தின் ரத்தங்கள் என்று புகுந்து விளையாடுகின்றனர் அ.தி.மு.க.-வினர். ஜெயலலிதாவின் அறிவிப்பு வெளியானதும், ஆரம்பத்தில் அடக்கி வாசித்துக் கொண்டிருந்த சில மாவட்டச் செயலாளர்களும், தகவல் உண்மைதான் என்று உறுதியானதும் வாய் நிறையப் பல்லாகக் காணப்படுகிறார்கள்.

அ.தி.மு.க. வட்டாரங்களில் சிலருடன் பேசியபோது, “எதை எடுத்தாலும் பணம்.. பணம்.. என்று ரேட் பேசிக்கொண்டிருந்தார்கள். கட்சியில் இருப்பதற்கே சங்கடமாகக்கூட இருந்தது. கடந்த ஆட்சியில் தி.மு.க.-வினரோடு ஒன்றாகத் திரிந்தவர்கள் எல்லாம், தி.மு.க. ஆட்சியில் சுட்ட பணத்தில் ஒரு பகுதியை மன்னார்குடி குடும்பத்தில் யாருக்காவது கொடுத்துவிட்டு, இந்த ஆட்சியிலும் பணம் பண்ணத் தொடங்கிய கொடுமைதான் உச்சக்கட்டம்” என்றார்கள்.

அ.தி.மு.க. என்ற கட்சியில் முகம் தெரியப்பட்ட எல்லோருமே, ஏதோ ஒரு காலகட்டத்தில், ஏதோ ஒரு தொகையாவது மன்னார்குடி குடும்பத்தில் ஏதாவது ஒரு நபருக்கு ஏதோ ஒரு வகையில் கொடுத்திருக்கிறார்கள் என்பதுதான் ஆச்சரியம்! சீனியாரிட்டி அல்லது பாபுலாரிட்டியில் பதவிக்கு வருவதற்கும் பைசா கொடுக்க வேண்டியிருந்திருக்கிறது.

“அடாடா.. அம்மா ஆட்சிக்கு வந்தவுடன் இந்த முடிவை எடுத்திருந்தா நல்லாயிருக்குமே” என்று அங்கலாய்ப்பவர்களில் பலர், சமீபத்தில் நடைபெற்ற உள்ளாட்சித் தேர்தல்களில் அ.தி.மு.க. டிக்கெட்டில் போட்டியிட்டவர்கள்! சில மேயர் வேட்பாளர்கள் உட்பட பலரும் பணம் கொடுத்தே சீட் வாங்கியிருக்கிறார்கள்.

சின்னம்மா நீக்கப்பட்டார் என்றவுடன், இந்தக் கதையெல்லாம் இப்போது வெளியாகின்றது.

உதாரணமாக, தென்மாவட்ட தற்போதைய மேயர் ஒருவர் 4-கோடி கொடுத்தார் என்கிறது ஒரு தகவல். அவரது, ‘பழைய தொழில்’ பற்றி உளவுத்துறை கொடுத்த ரிப்போர்ட் அம்மா வரை போகாமல் செய்வதற்கான அன்பளிப்புதான் 4-கோடி.

4-கோடி கொடுத்த இன்னாள் மேயரின், முன்னாள் தொழில்.. வேறு என்ன, கட்டப் பஞ்சாயத்துதான்! இதுபோல பலரும் ‘சின்னம்மாவால் தூய்மைப்படுத்தப் பட்டிருக்கிறார்கள்!

அவர்கள் எல்லாம் மிக எளிதாக பைசாவிற்காக பதவி வணிகம் நடைபெற்றபோது, வெளியேயிருந்து பார்த்து ரத்தக் கண்ணீர் வடித்த உண்மைத் தொண்டர்கள் பலர்தான், இன்று பட்டாசு வெடிப்பவர்கள்!

சசிகலாவும் 69 எம்.எல்.ஏக்களும், ஜெயலலிதா அதிரடி முடிவு.

அதிமுக பொதுச்செயலாளரும், முதல் அமைச்சருமான ஜெயலலிதா 19.12.2011 வெளிட்டுள்ள அறிக்கையில் கூறி இருப்பதாவது:

1. வி.கே.சசிகலா (கழக தலைமை செயற்குழு உறுப்பினர்)

2. ம.நடராஜன்

3. திவாகர் (மன்னார்குடி)

4. டி.டி.வி. தினகரன்

5. வி. பாஸ்கரன்

6. வி.எம்.சுதாகரன்

7. டாக்டர் எஸ்.வெங்கடேஷ்

8. எம்.ராமச்சந்திரன்

9. ராவணன்

10. மோகன் (அடையாறு)

11. குலோத்துங்கன்

12. ராஜராஜன்

13. மகாதேவன்

14. தங்கமணி

ஆகியோர் இன்று (19.12.2011) முதல் கழகத்தின் அடிப்படை உறுப்பினர் பொறுப்பு உள்பட அனைத்து பொறுப்புகளில் இருந்தும் நீக்கி வைக்கப்படுகிறார்கள். கழக உடன்பிறப்புகள் யாரும் இவர்களுடன் எந்தவித தொடர்பும் வைத்துக் கொள்ளக்கூடாது என கேட்டுக்கொள்கிறேன்.

இவ்வாறு அதிமுக பொதுச்செயலாளரும், முதல் அமைச்சருமான ஜெயலலிதா அறிக்கையில் கூறி உள்ளார்.

ஜெயலலிதாவின் இந்த நடவடிக்கையால் சசிகலா குடும்பத்தினர் அதிர்ச்சி அடைந்திருப்பதாகவும், கட்சியில் இருந்து நீக்கப்படவிருப்பதை முன்னரே அறிந்த சசிகலா 2 ஸ்கார்பியோ கார்களில் தனது உடைமைகளுடன் போயஸ் தோட்டத்தில் இருந்து வெளியேறியதாகவும் தகவல்கள் தெரிவிக்கின்றன.

நடராஜனை முதல்வராக்கும் மிகப் பெரிய திட்டம்

அதிமுகவிலும் சரி, ஆட்சியிலும் சரி ஆரம்பம் முதலே சசிகலா முக்கிய அதிகார மையமாக உருவெடுத்து பெரும் குழப்பங்களை ஏற்படுத்தி வந்தபோதும் பொறுமையாக இருந்த ஜெயலலிதா, சமீப காலமாக தனது ஆட்சிக்கே உலை வைக்கும் அளவுக்கு ஆட்சியைப் பிடிக்கும் அளவுக்கு சிந்திக்கத் தொடங்கியதும், சீர்குலைவு நடவடிக்கைகளை முடுக்கி விட்டதாலும்தான் பொறுக்க முடியாமல் சசிகலா கும்பலை அதிமுகவை விட்டு தூக்கி விட்டதாக கூறப்படுகிறது.

ஆனால் ஜெயலலிதாவே எதிர்பாராத வகையில் சசிகலா தரப்பின் சதிச் செயல்கள் இருந்ததாக தகவல் அறிந்த வட்டாரங்கள் தெரிவிக்கின்றன. அதாவது தங்களுக்கு ஆதரவான அதிகாரிகளை வைத்து ஆட்சிக்கு பெரும் நெருக்கடியை ஏற்படுத்துவது, பின்னர் தங்களுக்குச் சாதகமாக எம்.எல்.ஏக்களை வளைத்து கட்சியைக் கைப்பற்றுவது என்ற திட்டமும் தீட்டப்பட்டதாக ரகசியத் தகவல்கள் தெரிவிக்கின்றன.

சசிகலாவின் சமுகமான முக்குளத்தோர் சமுகத்தை சார்ந்த எம்.எல்.ஏ வினர் 69பேர் உள்ளனர் என்பது குறிப்பிடத்தக்கது.

மேலும் பெங்களூர் சிறப்பு நீதிமன்றத்தில் நடந்து வரும் சொத்துக் குவிப்பு வழக்கில் ஜெயலலிதாவுக்கு பாதகமாக தீர்ப்பு வந்தால் வழக்கம் போல ஜெயலலிதாவின் விசுவாசி ஓ.பன்னீர் செல்வம் போன்றவர்கள் பதவிக்கு வந்து விடாமல் தடுத்து நடராஜனை முதல்வராக்கும் மிகப் பெரிய திட்டமும் சசிகலா தரப்பில் இருந்ததாக கூறப்படுகிறது.

இதெல்லாம் ஜெயலலிதாவின் கவனத்திற்குப் போனதால் அவர் பெரும் அதிர்ச்சி அடைந்துள்ளார். இதையடுத்தே சசிகலாவை நீக்கும் அதிரடி முடிவுக்கு அவர் வந்ததாக கூறுகிறார்கள்

சசிகலாவின் அதிகாரத் தலையீடு

உளவுத்துறை ஐஜியாக இருந்து வந்த பொன் மாணிக்கவேல் நியமனமும், இடமாற்றமும் ஒரு முக்கிய உதாரணமாக கூறப்படுகிறது. இவர் சசிகலாவுக்கு மிகவும் நெருங்கியவர். இதனால்தான் அந்தப் பதவிக்கு கொண்டு வரப்பட்டார்.

உளவுத்துறை தகவல்களை தன்னிடம் நேரடியாக கொடுக்காமல் சசிகலாவிடம் போய் பொன் மாணிக்கவேல் தொடர்ந்து கொடுத்து வந்ததாகவும், இதனால் அதிர்ச்சி அடைந்த ஜெயலலிதா, அவரது செயல்பாடுகள் பிடிக்காததால் அதிரடியாக அந்தப் பதவியிலிருந்து பொன் மாணிக்கவேலை தூக்கினார். இது சசிகலாவுக்கு முதல் ஷாக் என்கிறார்கள்.

அதேபோல நடராஜனுக்கு மிகவும் நெருக்கமானவரான ஐஏஎஸ் அதிகாரி பன்னீர்செல்வத்தையும் அதிரடியாக, அவருக்குக் கொடுக்கப்பட்ட சிறப்புத் திட்ட செயலாக்கத் துறை செயலாளர் பொறுப்பிலிருந்து தூக்கி 2வது ஷாக்கைக் கொடுத்தார் ஜெயலலிதா.

இதை விட இன்னொரு முக்கிய விஷயம் உள்ளது. அது வரைமுறையே இல்லாமல் தாறுமாறாக பணம் பார்க்க ஆரம்பித்து விட்டார் சசிகலா என்பதுதான். சாதாரண பியூன் நியமனம் முதல் அரசுத் துறை ஊழியர்களின் பதவி உயர்வு, இடமாறுதல் என எல்லாவற்றிற்கும் மிகப் பெரிய அளவில் காசு வாங்க ஆரம்பித்து விட்டார்கள் என்பதே அது.

டெண்டர், நியமனம், இடமாறுதல், பதவி உயர்வு என எதுவாக இருந்தாலும் ஒரு ரேட்டை நியமித்து சசிகலா தரப்பு கறாராக வாங்கி வந்ததாக கூறப்படுகிறது. இதெல்லாம் சேர்ந்துதான் சசிகலாவை கட்சியை விட்டு தூக்கும் முடிவுக்கு ஜெயலலிதாவைக் கொண்டு சென்றதாக பேசுகிறார்கள்.

ஜெ. வீடு, அதிமுக அலுவலகம் முன்பு இனிப்பு வழஙகி கட்சியினர் மகிழ்ச்சி.

சென்னையில் ஜெயலலிதாவின் இல்லம் முன்பு கூடிய அதிமுகவினர் இனிப்பு வழங்கி மகிழ்ச்சியை கொண்டாடினர். அதிமுக தலைமை அலுவலகம் முன்பும் கட்சி தொண்டர்கள் குவிந்தனர். தொண்டர்கள் குவிந்ததால் போலீஸ் பாதுகாப்பு அதிகரிக்கப்பட்டுள்ளது. திருப்பூர், திண்டிவனம், உளுந்தூர் பேட்டை, விழுப்புரத்திலும் அதிமுக தொண்டர்கள் உற்சாகத்தில் வெடி வெடித்து கொண்டாடினர்.

ஜெயலலிதாவின் இந்த நடவடிக்கையை வரவேற்று, உளுந்தூர்பேட்டை ஒன்றிய செயலாளர் பழனிவேலு, நகர செயலாளர் துரை, ஒன்றிய சேர்மேன் பாலு உள்பட அதிமுகவினர் சுமார் 100க்கும் மேற்பட்டோர், உளுந்தூர் பேட்டை பேருந்து நிலையத்தில் பட்டாசு வெடித்தும், இனிப்பு வழங்கியும் கொண்டாடினர்.

ஜெயலலிதா, சசிகலாவை மீண்டும் சேர்த்துக்கொள்வாரா?

இருப்பினும் ஜெயலலிதா, சசிகலாவை கட்சியை விட்டு தள்ளி வைப்பது இது முதல் முறையல்ல. இதற்கு முன்பும் 1997ம் ஆண்டு ஒருமுறை அவர் கட்சியை விட்டு நீக்கினார் ஜெயலலிதா. அப்போது 11 மாதங்களுக்கு போயஸ் கார்டன் பக்கமே வராமல் இருந்தார் சசிகலா. பின்னர் ஜெயலலிதாவே, சசிகலாவை தன்னுடன் சேர்த்துக் கொண்டார் என்பது நினைவிருக்கலாம்.

எனவே இன்றைய நீக்கம் எந்த அளவுக்கு வீரியம் மிகுந்தது என்பதை போகப் போகத்தான் தெரிந்து கொள்ள முடியும்.